രാജ്യത്ത് കോവിഡ് കേസുകളില്‍ കുറവ്. ഏപ്രില്‍ 14 ന് ശേഷം ആദ്യമായി പ്രതിദിന രോഗബാധിതരുടെ എണ്ണം രണ്ട് ലക്ഷത്തിന് താഴെ രേഖപ്പെടുത്തി. 1.96 ലക്ഷം പേര്‍ക്കാണ് പുതുതായി രോഗം ബാധിച്ചത്. മരണനിരക്കിലും സമാനമായ ഇടിവ് സംഭവിച്ചു. 3,511 കോവിഡ് മരണങ്ങളാണ് കഴിഞ്ഞ 24 മണിക്കൂറിനിടെ രാജ്യത്ത് സ്ഥിരീകരിച്ചത്.
രാജ്യത്തെ ആകെ മരണസംഖ്യയുടെ 50 ശതമാനവും റിപ്പോര്‍ട്ട് ചെയ്തത് രണ്ടാം തരംഗത്തിന്റെ ആരംഭത്തിന് ശേഷമാണ്. മാര്‍ച്ചിന് ശേഷമുള്ള ഏഴ് ആഴ്ചകളിലായി 1.4 ലക്ഷം പേര്‍ക്കാണ് മഹാമാരിയില്‍ ജീവന്‍ നഷ്ടമായത്. ആഗോളതലത്തില്‍ 16 ശതമാനം കേസുകളും ഇന്ത്യയിലാണ്. മരണസംഖ്യയില്‍ ഒന്‍പത് ശതമാനവും.
അടിയന്തരമായി വാക്സിന്‍ ഇറക്കുമതി ചെയ്യാനും വിതരണം നടത്താനും കേന്ദ്രത്തിനോട് ആവശ്യപ്പെട്ട് സംസ്ഥാനങ്ങള്‍ രംഗത്തെത്തി. നിര്‍മാണ കമ്പനികള്‍ സംസ്ഥാനങ്ങള്‍ നേരിട്ട് വിതരണം നടത്തില്ല എന്ന് വ്യക്തമാക്കിയ പശ്ചാത്തലത്തിലാണ് നടപടി. സമ്മര്‍ദം വര്‍ദ്ധിക്കുന്ന സാഹചര്യത്തില്‍ കേന്ദ്ര വിദേശകാര്യ മന്ത്രി എസ് ജയശങ്കര്‍ അമേരിക്കന്‍ കമ്പനിയുമായുള്ള ചര്‍ച്ച വേഗത്തിലാക്കുമെന്നാണ് പ്രതീക്ഷ. ഇന്നലെ അമേരിക്കയിലേക്ക് തിരിച്ച അദ്ദേഹം യുഎസ് സെക്രട്ടറി ഓഫ് സ്റ്റേറ്റ് ആന്തണി ബ്ലിങ്കണുമായി കൂടിക്കാഴ്ച നടത്തി.
കേന്ദ്ര ആരോഗ്യമന്ത്രാലയത്തിന്റെ കണക്കനുസരിച്ച് 1.80 കോടി വാക്സിന്‍ ഡോസ് സംസ്ഥാനങ്ങളുടേയും കേന്ദ്രഭരണ പ്രദേശങ്ങളുടേയും പക്കലുണ്ട്. അടുത്ത മൂന്ന് ദിവസം 48 ലക്ഷം വാക്സിന്‍ കൂടി വിതരണം നടത്തുമെന്നും കേന്ദ്രം അറിയിച്ചു. 21.80 കോടി വാക്സിനാണ് സൗജന്യമായും അല്ലാതെയും സംസ്ഥാനങ്ങള്‍ക്ക് ഇതുവരെ ലഭിച്ചിട്ടുള്ളത്.
You must be logged in to post a comment Login