മാരുതിയുടെ കാറുകൾ പരിശോധിക്കുന്നു

മോട്ടോർ ജനറേറ്റർ യൂണിറ്റിൽ തകരാർ സംശയിച്ച് രാജ്യത്തെ പ്രധാന വാഹന നിർമാതാക്കളായ മാരുതി സുസുക്കി ഇന്ത്യ ലിമിറ്റഡ്(എം എസ് ഐ എൽ) 1,81,754 കാറുകൾ തിരിച്ചുവിളിച്ചു പരിശോധിക്കുന്നു. സിയാസ്, എർട്ടിഗ, വിറ്റാര ബ്രേസ, എസ് ക്രോസ്, എക്സ് എൽ സിക്സ് എന്നീ മോഡലുകളുടെ പെട്രോൾ വകഭേദങ്ങളിലാണ് നിർമാണ തകരാർ സംശയിക്കുന്നത്. 2018 മാർച്ച് നാലിനും 2020 ഒക്ടോബർ 27നുമിടയ്ക്കു നിർമിച്ച വാഹനങ്ങൾക്കാണു പരിശോധന ആവശ്യമുള്ളതെന്നും കമ്പനി അറിയിച്ചിട്ടുണ്ട്.

പരിശോധന ആവശ്യമുള്ള വാഹനങ്ങളുടെ നിർമാതാക്കളെ മാരുതി സുസുക്കിയുടെ അംഗീകൃത വർക്ഷോപ്പുകൾ വിവരം അറിയിക്കും. തുടർന്ന് വാഹനം വർക്ഷോപ്പിലെത്തിച്ചാൽ തകരാറുള്ള ഭാഗം സൗജന്യമായി മാറ്റി നൽകുമെന്നാണു മാരുതി സുസുക്കിയുടെ വാഗ്ദാനം.
നവംബർ ആദ്യ ആഴ്ച മുതലാവും വാഹന പരിശോധനയും തകരാർ പരിഹരിക്കലും ആരംഭിക്കുകയെന്നും കമ്പനി വെളിപ്പെടുത്തി. നിർദിഷ്ട പരിശോധന പൂർത്തിയാവും വരെ വെള്ളക്കെട്ടുള്ള മേഖലകളിൽ ഈ വാഹനങ്ങൾ ഓടിക്കുന്നതും ഇലക്ട്രിക്കൽ/ഇലക്ട്രോണിക് ഘടകങ്ങളിൽ നേരിട്ടു വെള്ളം വീഴുന്നതും ഒഴിവാക്കണമെന്നും കമ്പനി നിർദേശിക്കുന്നു.