അണ്ടൂർക്കോണം ഗ്രാമപഞ്ചായത്തിൽ കേരഗ്രാമം പദ്ധതിയുടെ ഉദ്ഘാടനം മന്ത്രി പി പ്രസാദ് നിർവഹിച്ചു

കേരള സർക്കാർ കാർഷിക വികസന ക്ഷേമ വകുപ്പിന്റെ കേരഗ്രാമം പദ്ധതി അണ്ടൂർക്കോണം ഗ്രാമപഞ്ചായത്ത് തല ഉദ്ഘാടനം കൃഷി മന്ത്രി പി പ്രസാദ് നിർവഹിച്ചു. അണ്ടൂര്‍ക്കോണം ഗ്രാമപഞ്ചായത്ത് പ്രസിഡന്റ് എസ്. ഹരികുമാര്‍ അധ്യക്ഷത വഹിച്ചു.ഉദ്ഘാടനത്തോടനുബന്ധിച്ച് കാര്‍ഷിക സെമിനാര്‍, ധനസഹായ വിതരണം, തെങ്ങ് കയറ്റ യന്ത്ര വിതരണം, ജലസേചന സെറ്റ് വിതരണം, തെങ്ങിന് ജൈവവള വിതരണോദ്ഘാടനം, തെങ്ങ് കയറ്റ പരിശീലനം, എക്‌സിബിഷന്‍ എന്നിവയും നടന്നു .തെങ്ങിന്റെ രോഗം കുറയ്ക്കുകയും ഉത്പാദനം കൂട്ടുകയും ചെയ്യുക എന്ന ലക്ഷ്യത്തോടെ ഒരു പഞ്ചായത്തിന് 76 ലക്ഷം രൂപ ചിലവിട്ട് നടപ്പാക്കുന്നതാണ് കേരഗ്രാമം പദ്ധതി. ജില്ലയിലെ ആനാട് ചെമ്മരുതി , മണമ്പൂർ , അണ്ടൂർകോണം എന്നീ പഞ്ചായത്തുകളിലും നഗരസഭയിലെ കഴക്കൂട്ടം കൃഷിഭവനിലുമാണ് ഈ വർഷം പദ്ധതി നടപ്പാക്കുക. 625 ഏക്കറിലായി 43750 ൽ കുറയാത്ത തെങ്ങുകളുള്ള പഞ്ചായത്തുകളാണ് തെരഞ്ഞെടുക്കുന്നത്. ഒരേക്കറിൽ 175 തെങ്ങുകൾ വേണം. ഒരു തെങ്ങു മുതൽ അഞ്ച് ഹെക്ടർ വരെ കൃഷിയുള്ള കർഷകർക്ക് ഈ പദ്ധതിയിൽ ചേരാം.പദ്ധതി അനുസരിച്ച് പഞ്ചായത്ത് വാർഡ് അടിസ്ഥാനത്തിൽ സർവ്വേ നടത്തി വാർഡ് തലത്തിൽ കർഷക യോഗം ചേർന്നു. വാർഡ് തല കേര സമിതികൾ രൂപീകരിക്കും. ക്ലസ്റ്റർ അടിസ്ഥാനത്തിൽ രൂപീകരിക്കുന്ന സബ് കമ്മിറ്റികൾ ആകും പദ്ധതി നടത്തിപ്പ് ചുമതല.