സ്മാർട്ഫോൺ, ടി വി, ഓഡിയോ ഉപകരണ വിപണികളിൽ സാന്നിധ്യം ശക്തമാക്കിയ ശേഷം വൈദ്യുത വാഹന(ഇ വി) വ്യാപാരത്തിലേക്കു ശ്രദ്ധ കേന്ദ്രീകരിക്കുകയാണു ടെക്നോളജി കമ്പനികൾ. ആപ്പിൾ, ഗൂഗിൾ, വാവെയ് തുടങ്ങിയ വൻകമ്പനികളെല്ലാം ഇ വി വിപണി പ്രവേശത്തിൽ തൽപരരാണ്. ബിബികെ ഇലക്ട്രോണിക്സിന്റെ ഉടമസ്ഥതയിലുള്ള സ്മാർട്ഫോൺ ബ്രാൻഡുകളായ ഒപ്പോയും റിയൽമിയും വൺ പ്ലസുമെല്ലാം ഇ വി നിർമാണം നോട്ടമിട്ടിട്ടുണ്ട്.
സ്മാർട്ഫോൺ വിപണിയിലെ ചൈനീസ് വമ്പൻമാരായ ഷഓമി കോർപറേഷനാവട്ടെ കഴിഞ്ഞ ഒക്ടോബറിൽ തന്നെ ഇ വി മേഖലയിൽ പ്രവേശിക്കാനുള്ള പദ്ധതി പ്രഖ്യാപിച്ചിരുന്നു. ഇപ്പോഴാവട്ടെ കമ്പനിയുടെ ആദ്യ കാർ 2024ൽ പുറത്തിറങ്ങുമെന്നാണു ഷഓമി സ്ഥാപകനും ചീഫ് എക്സിക്യൂട്ടീവ് ഓഫിസറുമായ ലീ ജൂൻ ചൈനീസ് സമൂഹ മാധ്യമ പ്ലാറ്റ്ഫോമായ വെയ്ബൊയിലെ ചോദ്യോത്തരവേളയിൽ വെളിപ്പെടുത്തിയിരിക്കുന്നത്. ഷഓമിയുടെ ഇ വി 2026ൽ അരങ്ങേറുമെന്നായിരുന്നു ഇതുവരെയുള്ള കണക്കുകൂട്ടൽ.
ഈ വർഷം ആദ്യമാണു ഷഓമി വൈദ്യുത വാഹന നിർമാണത്തിനായി പ്രത്യേക വിഭാഗം തന്നെ രൂപീകരിച്ചത്. ബെയ്ജിങ്ങിൽ പുതിയ നിർമാണശാല സ്ഥാപിക്കാനുള്ള നടപടികൾ പുരോഗമക്കുകയാണെന്നും കഴിഞ്ഞ ആഴ്ച കമ്പനി വെളിപ്പെടുത്തിയിരുന്നു. പ്രതിവർഷം മൂന്നു ലക്ഷം ഇ വികൾ ഉൽപ്പാദിപ്പിക്കാൻ ശേഷിയുള്ള ശാലയാണു ഷഓമി ലക്ഷ്യമിടുന്നത്. ബെയ്ജിങ് ഇക്കണോമിക് ആൻഡ് ടെക്നോളജിക്കൽ ഡവലപ്മെന്റ് സോണിലെ നിർദിഷ്ട ഇ വി നിർമാണശാല 2024ൽ പ്രവർത്തനക്ഷമമാവുമെന്നാണു കരുതുന്നത്.
You must be logged in to post a comment Login