ചെന്നൈ: സംവിധായകനും നടനുമായ പ്രതാപ് പോത്തന്റെ സംസ്കാരം ചെന്നൈയിലെ ന്യൂ ആവടി റോഡിലെ വേളാങ്കാട് ശ്മശാനത്തിൽ മതപരമായ ചടങ്ങുകൾ ഒഴിവാക്കി നടത്തി. കമൽഹാസൻ, മണിരത്നം, സത്യരാജ്, വെട്രിമാരൻ, റഹ്മാൻ തുടങ്ങി നിരവധി താരങ്ങൾ പ്രതാപ് പോത്തന് ആദരാഞ്ജലികൾ അർപ്പിക്കാൻ എത്തിയിരുന്നു. ചെന്നൈയിലെ നോർക്ക പ്രതിനിധി കേരള മുഖ്യമന്ത്രിക്കും സാംസ്കാരിക മന്ത്രിക്കും വേണ്ടി പുഷ്പചക്രം അർപ്പിച്ചു. പ്രതാപ് പോത്തന്റെ മരണവാർത്ത ഞെട്ടലോടെയാണ് മലയാളികൾ കേട്ടത്. മലയാള സിനിമയിലെ ബഹുമുഖ വ്യക്തിത്വമായ നടനും സംവിധായകനും എഴുത്തുകാരനും നിർമ്മാതാവുമാണ് പ്രതാപ് പോത്തൻ.
സംവിധായകൻ ഭരതനുമായുള്ള അടുപ്പം കൊണ്ടാണ് പ്രതാപ് പോത്തൻ ചലച്ചിത്ര രംഗത്തേക്ക് കടന്നുവന്നത്. 1978 ൽ ഭരതന്‍റെ ‘ആരവം’ എന്ന ചിത്രത്തിലൂടെ അരങ്ങേറ്റം കുറിച്ച പ്രതാപ് പോത്തൻ തകര എന്ന ക്ലാസ് സിനിമയിലൂടെ പ്രേക്ഷകരുടെ ഹൃദയം കീഴടക്കി. 1980 കളിൽ മലയാളം, തമിഴ് സിനിമകളിൽ അദ്ദേഹം ഒരു സെൻസേഷനായി മാറി. ചമരം, വരുമയിൽ നിരം ചുവപ്പ്, മധുമലർ, കാതൽ കഥൈ, അഴിയാട്ട കോലങ്ങൽ, നെഞ്ചത്തെ കിള്ളാതെ, നവംബറിന്‍റെ നഷ്ടം, സിന്ദൂര സന്ധ്യക്കു മൗനം, ലോറി, ഒന്നുമുതൽ പൂജ്യം വരെ, തൻമാത്ര, 22 ഫീമെയിൽ കോട്ടയം എന്നിവയാണ് സിനിമാപ്രേമികളുടെ ഹൃദയത്തോട് ചേർന്നുനിൽക്കുന്ന ചിത്രങ്ങൾ.
