വിമാനത്തിലെ കയ്യേറ്റവുമായി ബന്ധപ്പെട്ട് എൽ.ഡി.എഫ് കൺവീനർ ഇ.പി ജയരാജനെതിരെ വധശ്രമത്തിന് കേസെടുക്കണമെന്ന് ഹൈബി ഈഡൻ എം.പി. രണ്ട് യൂത്ത് കോൺഗ്രസ് പ്രവർത്തകരും ജനാധിപത്യ മാനദണ്ഡങ്ങൾ പാലിച്ചാണ് പ്രതിഷേധിച്ചത്. ശബരിനാഥിനെതിരെ ഗൂഡാലോചന നടത്തിയതിനും സമരത്തിന് പ്രേരിപ്പിച്ചതിനും കേസെടുത്താൽ, യൂത്ത് കോൺഗ്രസ് പ്രവർത്തകരെ വധിക്കാൻ ശ്രമിച്ചതിന് ജയരാജനെതിരെ കേസെടുക്കണമെന്നും അദ്ദേഹം ആവശ്യപ്പെട്ടു.
എല്ലായിടത്തും കറുത്ത വസ്ത്രം ധരിക്കുന്നത് നിരോധിച്ചുകൊണ്ട് വലിയ വലയം തീർത്താണ് മുഖ്യമന്ത്രി കേരളത്തിൽ പര്യടനം നടത്തിയത്. ഇതിനെതിരെയാണ് യൂത്ത് കോൺഗ്രസ് പ്രതിഷേധിച്ചതെന്നും ഹൈബി ഈഡൻ പറഞ്ഞു.
കേരളത്തിലെ സ്വർണക്കടത്ത് കേസുമായി ബന്ധപ്പെട്ട് സ്വപ്ന സുരേഷ് ഉന്നയിച്ച ആരോപണങ്ങളുടെ അടിസ്ഥാനത്തിലാണ് യൂത്ത് കോൺഗ്രസ് പ്രതിഷേധം സംഘടിപ്പിച്ചത്. മുഖ്യമന്ത്രിയെ വധിക്കാൻ ശ്രമം നടന്നുവെന്ന ആരോപണം പൊളിഞ്ഞു. ശബരിനാഥിനെതിരെ കേസെടുത്താൽ ഇ.പി ജയരാജനെതിരെ ശക്തമായ പ്രക്ഷോഭം സംഘടിപ്പിക്കുമെന്നും ഹൈബി ഈഡൻ പറഞ്ഞു.
