ഗാന്ധിനഗര്‍: തെരഞ്ഞെടുപ്പിന് മുന്നോടിയായി ഗുജറാത്തിലെ കേന്ദ്ര -സംസ്ഥാന സര്‍ക്കാര്‍ ഓഫീസുകളിലെ പ്രധാനമന്ത്രി നരേന്ദ്രമോദിയുടെ ഫോട്ടോകള്‍ നീക്കം ചെയ്യാനോ മറക്കാനോ നിര്‍ദേശം നല്‍കണമെന്ന് തെരഞ്ഞെടുപ്പ് കമീഷനോട് അഭ്യര്‍ഥിച്ച്‌ എ.എ.പി.
ബി.ജെ.പിയുടെ പ്രധാന തെരഞ്ഞെടുപ്പ് പ്രചാരകനായ മോദിയുടെ ചിത്രങ്ങള്‍ സര്‍ക്കാര്‍ ഓഫീസുകളില്‍ പ്രദര്‍ശിപ്പിക്കുന്നത് തെരഞ്ഞെടുപ്പ് ചട്ടങ്ങളുടെ ലംഘനമാണെന്നും എ.എ.പി ചൂണ്ടിക്കാട്ടി.
പ്രചാരണത്തിനിറങ്ങുന്ന രാഷ്ട്രീയ നേതാക്കളുടെ ഫോട്ടോകള്‍ക്ക് തെരഞ്ഞെടുപ്പിനെ സ്വാധീനിക്കാന്‍ കഴിയും. സ്വതന്ത്രവും സുതാര്യവുമായ തെരഞ്ഞെടുപ്പ് നടക്കുന്നതിനായി സംസ്ഥാനത്തുടനീളമുള്ള സര്‍ക്കാര്‍ ഓഫീസുകളിലെ പ്രധാനമന്ത്രിയുടെ ഫോട്ടോകള്‍ മറക്കുകയോ നീക്കം ചെയ്യുകയോ വേണം.
ഇതുമായി ബന്ധപ്പെട്ട നിര്‍ദേശങ്ങള്‍ തെരഞ്ഞെടുപ്പ് കമീഷന്‍ ഉടന്‍ പുറപ്പെടുവിക്കണമെന്നും എ.എ.പിയുടെ പരാതിയില്‍ പറയുന്നു.
ഡിസംബര്‍ ഒന്ന്, അഞ്ച് തിയതികളില്‍ രണ്ടു ഘട്ടങ്ങളിലായാണ് ഗുജറാത്ത് തെരഞ്ഞെടുപ്പ് നടക്കുന്നത്. വോട്ടെണ്ണല്‍ ഡിസംബര്‍ എട്ടിന് നടക്കും. ആകെ182 സീറ്റുകളിലേക്കാണ് തെരഞ്ഞെടുപ്പ്. 178 സീറ്റുകളിലേക്കുള്ള സ്ഥാനാര്‍ഥികളെ എ.എ.പി ഇതിനകം പ്രഖ്യാപിച്ചിട്ടുണ്ട്.
