Tuesday, January 31, 2023

കോവിഡ്; ഡെഡ് ബോഡി മാനേജ്‌മെന്റിനുള്ള മാർഗ്ഗനിർദ്ദേശങ്ങൾ പുതുക്കി

തിരുവനന്തപുരം: സംസ്ഥാനത്ത് കോവിഡ് കേസുകൾ കുറയുന്ന സാഹചര്യത്തിൽ ഡെഡ് ബോഡി മാനേജ്‌മെന്റിനുള്ള മാർഗ്ഗനിർദ്ദേശങ്ങൾ പുതുക്കിയതായി മന്ത്രി വീണാ ജോർജ്. പോസ്റ്റ്മോർട്ടത്തിനു മുമ്പുള്ള നിർബന്ധിത കോവിഡ് പരിശോധന ഒഴിവാക്കി. മരണം കോവിഡ് മൂലമാണെന്ന് ക്ലിനിക്കൽ സംശയം ശക്തമായാൽ റാപ്പിഡ് ആന്‍റിജൻ ടെസ്റ്റ് മതിയാകും. പോസ്റ്റ്മോർട്ടം സമയത്ത് എല്ലാ ആരോഗ്യ പ്രവർത്തകരും പിപിഇ കിറ്റ്, എൻ 95 മാസ്ക്, രണ്ട് കയ്യുറകൾ, ഫെയ്സ് ഷീൽഡുകൾ തുടങ്ങിയ അടിസ്ഥാന മുൻകരുതലുകൾ എടുക്കണമെന്നും പുതുക്കിയ മാർഗ്ഗനിർദ്ദേശങ്ങളിൽ വ്യക്തമാക്കുന്നു.

കോവിഡ് ബാധയെ തുടർന്ന് മരണപ്പെട്ടവരുടെ മൃതദേഹം വൃത്തിയാക്കുകയാണെങ്കിൽ രോഗം പടരാതിരിക്കാൻ കോവിഡ് മാർഗനിർദേശങ്ങൾ കർശനമായി പാലിക്കണം. മൃതദേഹം കുളിപ്പിക്കുക, വൃത്തിയാക്കുക, വസ്ത്രങ്ങൾ ധരിപ്പിക്കുക, മുടി കഴുകുക, ഷേവ് ചെയ്യുക, നഖങ്ങൾ മുറിക്കുക തുടങ്ങിയ ജോലികൾ ചെയ്യുന്നവർ കയ്യുറകൾ, ഫെയ്സ് ഷീൽഡ് / കണ്ണടകൾ, മെഡിക്കൽ മാസ്കുകൾ എന്നിവ ധരിക്കണം. എൻ 95 മാസ്ക് ധരിക്കുന്നത് നല്ലതാണ്. നീളമുള്ള കൈയുള്ള വസ്ത്രങ്ങൾ ധരിക്കുക, നടപടിക്രമങ്ങൾക്ക് ശേഷം ഉടനടി വസ്ത്രങ്ങൾ നീക്കം ചെയ്യുക, സോപ്പ് ഉപയോഗിച്ച് കഴുകുക തുടങ്ങിയവ നിർബന്ധമായും ചെയ്യണം.

ഹൃദ്രോഗം, പ്രമേഹം തുടങ്ങിയ ഗുരുതര രോഗങ്ങളുള്ളവരും 60 വയസ്സിനു മുകളിലുള്ളവരും കോവിഡ് ബാധിച്ച് മരിച്ച വ്യക്തിയുടെ ശരീരവുമായി നേരിട്ട് ഇടപഴകരുത്. കോവിഡ് വാക്സിനേഷന്‍റെ മുഴുവൻ ഡോസും എടുത്തവർ മൃതദേഹം കൈകാര്യം ചെയ്യണം. മൃതദേഹം സൂക്ഷിക്കുന്ന സ്ഥലങ്ങൾ സോഡിയം ഹൈപ്പോക്ലോറൈറ്റ് ലായനി ഉപയോഗിച്ച് വൃത്തിയാക്കണം. ശരീരവുമായി ഇടപഴകുന്ന എല്ലാവരും സോപ്പ് ഉപയോഗിച്ച് നന്നായി കുളിക്കണം. പനി, ചുമ, തൊണ്ടവേദന, ക്ഷീണം, വയറിളക്കം എന്നിവ 14 ദിവസത്തേക്ക് സ്വയം നിരീക്ഷിക്കണം. വീട്ടിൽ മരണം സംഭവിച്ചാൽ സമീപത്തെ ആരോഗ്യ പ്രവർത്തകരെ അറിയിക്കുകയും അവർ നൽകുന്ന മാർഗനിർദേശങ്ങൾ പാലിക്കുകയും വേണം.

Related Articles

- Advertisement -

Latest Articles

- Advertisement -

Latest Articles