കണ്ണൂർ: സ്വർണക്കടത്ത് കേസിലെ പ്രതി സ്വപ്ന സുരേഷിനും ബെംഗളൂരുവിലെ ആക്ഷൻ ഒടിടി പ്ലാറ്റ്ഫോം സിഇഒ വിജേഷ് പിള്ളയ്ക്കുമെതിരെ പൊലീസിൽ പരാതി നൽകി സി.പി.എം. തളിപ്പറമ്പ് ഏരിയ സെക്രട്ടറി കെ സന്തോഷാണ് തളിപ്പറമ്പ് പൊലീസിൽ പരാതി നൽകിയത്. മുഖ്യമന്ത്രി പിണറായി വിജയനും എം.വി.ഗോവിന്ദനും എതിരെ അപവാദ പ്രചാരണം നടത്തുന്നതിൽ നടപടി ആവശ്യപ്പെട്ടാണ് പരാതി.
മുഖ്യമന്ത്രിയേയും കുടുംബത്തെയും സി.പി.എം സംസ്ഥാന സെക്രട്ടറി എം.വി ഗോവിന്ദനെയും അപകീർത്തിപ്പെടുത്താൻ ശ്രമിക്കുന്നുവെന്നാണ് പരാതി. ചില നിയമവിരുദ്ധ നേട്ടങ്ങൾക്കായി ചില സാമൂഹ്യവിരുദ്ധരുടെ പിന്തുണയോടെ നടക്കുന്ന വലിയ ഗൂഢാലോചനയുടെ ഭാഗമാണിത്. മുഖ്യമന്ത്രിയെയും ഭരണപക്ഷ നേതാവിനെയും മോശമായി ചിത്രീകരിക്കുന്നതിലൂടെ ജനങ്ങളുടെ മനസ്സിൽ ഭയം ജനിപ്പിക്കുകയും ഇത്തരം ആരോപണങ്ങളിലൂടെ സർക്കാരിനെതിരെ കലാപത്തിന് പ്രതിപക്ഷത്തെ പ്രേരിപ്പിക്കുകയും ചെയ്യുന്നുവെന്നും പരാതിയിൽ പറയുന്നു.
