ഇടുക്കിയിലെ അക്രമകാരിയായ അരികൊമ്പനെ ഇന്ന് മയക്കുവെടി വയ്ക്കും. രാവിലെ 4.30ന് ദൗത്യത്തില്‍ പങ്കെടുക്കേണ്ട മുഴുവന്‍ ആളുകളും ചിന്നക്കനാല്‍ ഫാത്തിമ മാതാ സ്കൂളിലെ ബേസ് ക്യാമ്പില്‍ ഒത്തുചേരും. അവിടെ നിന്നും വിവിധ ടീമുകള്‍ ആയി തിരിഞ്ഞ് അരിക്കൊമ്പന്‍ ഉള്ള സ്ഥലത്തേക്ക് പുറപ്പെടും നിലവില്‍ അരിക്കൊമ്ബന്‍ വനംവകുപ്പിന്റെ നിരീക്ഷണത്തിലാണ്.
വനംവകുപ്പിന്റെ മാത്രം 8 സംഘം ആണ് ഉള്ളത്. ഇതുകൂടാതെ വിവിധ വകുപ്പുകളിലെ ആളുകള്‍ ഉള്‍പ്പെടെ 150 ഓളം പേര്‍ ദൗത്യത്തില്‍ പങ്കെടുക്കും. പൊലീസ് ഫയര്‍ഫോഴ്സ് മോട്ടോര്‍ വാഹനം ആരോഗ്യം കെഎസ്‌ഇബി തുടങ്ങിയ വകുപ്പിലെ ജീവനക്കാരാണ് സംഘത്തിലുള്ളത്.
ഹൈറേഞ്ച് സര്‍ക്കിള്‍ സിസി എഫ്‌ആര്‍എസ് അരുണ്‍, രമേഷ് ബിഷ്‌നോയ് മൂന്നാര്‍ ഡിഎഫ്‌ഓ എന്നിവരാണ് ദൗത്യത്തിന് മേല്‍നോട്ടം വഹിക്കുന്നത്. ദൗത്യ സംഘത്തിലെ സ്പെഷ്യല്‍ ടീം നയിക്കുന്നത്. വനം വകുപ്പ് ചീഫ് വെറ്റിനറി സര്‍ജന്‍ ഡോക്ടര്‍ അരുണ്‍ സക്കറിയ ആണ്. നാലു ഡോക്ടര്‍മാരാണ് ഈ സംഘത്തില്‍ ഉണ്ടാവുക. ദൗത്യത്തിന്‍റെ ഭാഗമായി ചിന്നക്കനാല്‍ പ‌ഞ്ചായത്തിലും ശാന്തന്‍പാറ പഞ്ചായത്തിലെ ആദ്യ രണ്ടു വാ‍ര്‍ഡുകളിലും നിരോധനാജ്ഞ പ്രഖ്യാപിച്ചിട്ടുണ്ട്.
