പോലീസിൽ ‘അവൾ’ ഒരുങ്ങിക്കഴിഞ്ഞു .വനിതാ പൊലീസുകാരുടെ ജോലി സംബന്ധവും വ്യക്തിപരവുമായ പ്രശ്നങ്ങൾ കേൾക്കാനും പരിഹാരത്തിനുമായാണ് ‘അവൾ’ വരുന്നത് .
തിരുവനന്തപുരം റൂറൽ പൊലീസാണ് വനിതാ പൊലീസുകാർക്കായി പദ്ധതി തയ്യാറാക്കിയത്. എല്ലാ പൊലീസ് സ്റ്റേഷനിലും മെന്റർ സംവിധാനവും ഇതിന്റെ ഭാഗമായി ഏർപ്പെടുത്തിയിട്ടുണ്ട്.
വനിതാ പൊലീസുകാർക്ക് അവരുടെ വ്യക്തിപരമായ പ്രശ്നങ്ങൾ പലപ്പോഴും പുരുഷ ഓഫീസർ മെന്ററുമായി പങ്കിടാൻ പ്രയാസമായിരിക്കും. ഈ പ്രശ്നം പരിഹരിക്കുകയെന്ന ലക്ഷ്യത്തോടെയാണ് പദ്ധതി .
വനിതാ പൊലീസിന്റെ വ്യക്തിപരവും ജോലിയുമായി ബന്ധപ്പെട്ടതുമായ പ്രശ്നങ്ങൾ തിരിച്ചറിയുക, ആവശ്യങ്ങളിലും പ്രശ്നങ്ങളിലും ശ്രദ്ധ നൽകുകയും അവരുടെ ഔദ്യോഗികവും വ്യക്തിപരവുമായ ക്ഷേമത്തിന് മതിയായ പിന്തുണ നൽകുകയും ചെയ്യുക.
ജോലി സ്ഥലങ്ങളിൽ എല്ലാത്തരം ഉപദ്രവവും ഒഴിവാക്കുക, സ്റ്റേഷനുള്ളിൽ ആരോഗ്യകരവും സൗഹാർദപരവുമായ പ്രവർത്തന അന്തരീക്ഷം ഉറപ്പാക്കി പൊതുജനങ്ങൾക്ക് മെച്ചപ്പെട്ട സേവനത്തിലേക്ക് നയിക്കുക, സ്ത്രീകൾക്ക് അവരുടെ പ്രശ്നങ്ങൾ പ്രകടിപ്പിക്കാനും അതിനുള്ള പരിഹാരങ്ങൾ നേടാനും സുശക്തവും സുരക്ഷിതവുമായ ഒരു പ്ലാറ്റ്ഫോം പ്രദാനം ചെയ്യുന്ന ഒരു സംവിധാനം സൃഷ്ടിക്കുക എന്നീ ഉദ്ദേശ്യത്തോടെയാണ് പദ്ധതിക്ക് തുടക്കമിട്ടതെന്ന് ജില്ലാ പൊലീസ് മേധാവി ഡി ശിൽപ്പ വ്യക്തമാക്കി.