ശ്രീലങ്കയ്‌ക്കും തായ്ലന്‍ഡിനും പിന്നാലെ വിസ ആവശ്യമില്ലാതെ ഇന്ത്യക്കാര്‍ക്ക് പ്രവേശനം നല്‍കി വിയറ്റനാം. ടൂറിസം വിണ്ടെടുക്കുന്നതിന്റെ ഭാഗമായാണ് നടപടിയെന്നാണ് റിപ്പോര്‍ട്ടുകള്‍. നിലവില്‍ ജര്‍മ്മനി, ഫ്രാന്‍സ്, ഇറ്റലി, സ്പെയിന്‍, ഡെന്‍മാര്‍ക്ക്, സ്വീഡന്‍, ഫിന്‍ലാന്‍ഡ് എന്നീ രാജ്യങ്ങളിലെ പൗരന്മാര്‍ക്ക് മാത്രമേ വിസയില്ലാതെ വിയറ്റ്നാമില്‍ പ്രവേശിക്കാന്‍ കഴിയുന്നത്. ഈ രാജ്യങ്ങളുട കൂട്ടത്തിലാണ് ഇപ്പോള്‍ ഇന്ത്യയെയും ഉള്‍പ്പെടുത്തിയിരിക്കുന്നത്.
ചൈനയും ഇന്ത്യയും പോലുള്ള പ്രധാന വിപണികള്‍ക്ക് ടൂറിസം വീണ്ടെടുക്കുന്നതിന് ഹ്രസ്വകാല വിസ ഒഴിവാക്കണമെന്ന് വിയറ്റ്നാമിലെ സാംസ്‌കാരിക, കായിക, ടൂറിസം മന്ത്രി ന്‍ഗുയെന്‍ വാന്‍ ഹംഗ് ആവശ്യപ്പെട്ടിരുന്നു. ഈ വര്‍ഷത്തെ ആദ്യ പത്ത് മാസങ്ങളില്‍ വിയറ്റ്നാമിന് ഏകദേശം 10 ദശലക്ഷം വിദേശ സഞ്ചാരികളെയാണ് ലഭിച്ചത്. 2022-ലെ സമാന കാലയളവിനെ അപേക്ഷിച്ച് 4.6 മടങ്ങ് വര്‍ധനവ് രേഖപ്പെടുത്തിയിട്ടുണ്ട്. കൂടാതെ 2023 ലെ ലക്ഷ്യത്തെ മറികടക്കാന്‍ വിയറ്റ്നാമിന് സാധിച്ചു.
ഓഗസ്റ്റ് പകുതി മുതലാണ് വിയറ്റ്നാം എല്ലാ രാജ്യങ്ങളില്‍ നിന്നുമുള്ളവര്‍ക്ക് ഇ-വിസകള്‍ നല്‍കാന്‍ തുടങ്ങിയത്. 90 ദിവസത്തെ സാധുത കാലയളവ് നല്‍കുകയും ഒന്നിലധികം എന്‍ട്രികള്‍ അനുവദിക്കുകയും ചെയ്തു. വിസ ആവശ്യകതകളില്‍ നിന്ന് ഒഴിവാക്കപ്പെട്ട 13 രാജ്യങ്ങളില്‍ നിന്നുള്ള പൗരന്മാര്‍ക്ക്, താമസത്തിന്റെ കാലാവധി മൂന്നിരട്ടിയായി നീട്ടി 45 ദിവസമായി സജ്ജീകരിക്കുകയും ചെയ്തിട്ടുണ്ട്.
തായ്‌ലന്‍ഡും ശ്രീലങ്കയും വിസ ഇളവുകള്‍ പ്രഖ്യാപിച്ചുകൊണ്ട് ഇന്ത്യന്‍ യാത്രക്കാര്‍ക്ക് മികച്ച അവസരങ്ങളാണ് സജ്ജമാക്കിയിരിക്കുന്നത്. ഈ മാസം 10 മുതലാണ് ഇന്ത്യന്‍ യാത്രക്കാര്‍ക്കുള്ള വിസയുടെ ആവശ്യകത തായ്‌ലന്‍ഡ് റദ്ദാക്കിയത്. വിസ ഇളവിനൊപ്പം ഇന്ത്യന്‍ ടൂറിസ്റ്റുകള്‍ക്ക് 30 ദിവസത്തെ താമസം അനുവദിക്കുന്നുണ്ട്. അടുത്ത വര്‍ഷം മെയ് 10 വരെ ഈ വിസ ഇളവ് നിലനില്‍ക്കും
