ഓൾ ഇന്ത്യ ടൂറിസ്റ്റ് പെർമിറ്റ് ചട്ടങ്ങളിലെ ഭേദഗതികൾ നിയമവിരുദ്ധം എന്ന ചൂണ്ടിക്കാട്ടി കെഎസ്ആർടിസി സമർപ്പിച്ച ഹർജി ഹൈക്കോടതി വ്യാഴാഴ്ച പരിഗണിക്കും. കേന്ദ്രസർക്കാറിനോട് ഹർജിയിൽ മറുപടി നൽകാൻ ഹൈക്കോടതി നിർദ്ദേശം നൽകിയിട്ടുണ്ട്.
നിയമത്തെ ചോദ്യം ചെയ്യാം എന്തെങ്കിലും കാരണം വേണമെന്ന് ചൂണ്ടിക്കാട്ടിയ കോടതി സർക്കാറിന് കീഴിലുള്ള കെഎസ്ആർടിസിക്ക് എങ്ങനെ കേന്ദ്ര നിയമത്തിനെതിരെ ഹർജി നൽകാൻ സാധിക്കുമെന്ന സംശയവും പ്രകടിപ്പിച്ചു.
ദേശസാത്കൃത റൂട്ടിലൂടെ ഓൾ ഇന്ത്യ ടൂറിസ്റ്റ് പെർമിറ്റ് ഉപയോഗിച്ചുകൊണ്ട് സ്റ്റേജ് ആയി ഓടിക്കുന്ന വാഹനങ്ങൾ നിയന്ത്രിക്കാൻ ഗതാഗത കമ്മീഷണർക്ക് നിർദ്ദേശം നൽകണമെന്ന് ആവശ്യപ്പെട്ട് കെഎസ്ആർടിസി 2023 ലെ ഓൾ ഇന്ത്യ ടൂറിസ്റ്റ് പെർമിറ്റ് ചട്ടങ്ങളിലെ രണ്ട് വകുപ്പുകൾ 1988ലെ മോട്ടോർ വാഹന നിയമത്തിനെതിരാണെന്ന് ആരോപിച്ചാണ് ഹർജി സമർപ്പിച്ചത്.
