വളരെയധികം ആരോഗ്യ ഗുണങ്ങളാൽ സമ്പന്നമാണ് വാഴപ്പിണ്ടി എന്ന് നമുക്കറിയാം. ശരീരത്തിലെ മാലിന്യങ്ങളെ പുറന്തള്ളാൻ സഹായിക്കുന്ന നാരുകളാൽ സമ്പന്നമാണ് വാഴപ്പിണ്ടി. വാഴപ്പിണ്ടി തോരൻ വെക്കാൻ ഉപയോഗിക്കും എന്നല്ലാതെ ഇതുകൊണ്ട് കിടുക്കൻ അച്ചാർ ഉണ്ടാക്കാനും പറ്റുമെന്ന് എത്രപേർക്കറിയാം.
വാഴപ്പിണ്ടി കൊണ്ട് എങ്ങനെ രുചികരമായ അച്ചാർ ഉണ്ടാക്കാം എന്ന് നോക്കാം. ഇതിനായി ആദ്യം തന്നെ വാഴപ്പിണ്ടി ചെറിയ കഷ്ണങ്ങളായി അരിഞ്ഞെടുക്കണം. നല്ലതുപോലെ കഴുകി വൃത്തിയാക്കിയതിനു ശേഷം വെള്ളം ഒട്ടുമില്ലാതെ ഊറ്റി എടുക്കണം.
ശേഷം നമുക്ക് ഒരു ചീനച്ചട്ടി അടുപ്പത്ത് വയ്‌ക്കാം. ഇതിലേക്ക് അല്പം നല്ലെണ്ണ ഒഴിച്ചു കൊടുക്കണം. നല്ലെണ്ണ നല്ലതുപോലെ ചൂടായി വരുമ്പോൾ ഇതിലേക്ക് കുറച്ച് കടുക് ഇട്ട് പൊട്ടിച്ചെടുക്കാം. കടുക് പൊട്ടി വരുമ്പോൾ അല്പം കറിവേപ്പിലയും ഇഞ്ചി, വെളുത്തുള്ളി എന്നിവ ആവശ്യാനുസരണം ചേർത്ത് കൊടുക്കാം.
ഇത് നല്ലതുപോലെ വഴറ്റി നിറം മാറി കഴിയുമ്പോൾ തീ കുറച്ചു വെച്ചതിനുശേഷം ഇതിലേക്ക് അല്പം മഞ്ഞൾപൊടി ചേർത്ത് കൊടുക്കാം. എരുവിന് ആവശ്യമായ മുളകുപൊടി കൂടി ചേർത്തതിന് ശേഷം നല്ലതുപോലെ മൂപ്പിച്ചെടുക്കണം. പാകത്തിന് ഉപ്പും അല്പം വിനാഗിരിയും കൂടി ചേർത്തു കൊടുക്കാം. വെള്ളം ഊറ്റി വച്ചിരിക്കുന്ന വാഴപ്പിണ്ടി കൂടി ചേർത്ത് നല്ലതുപോലെ ഇളക്കി യോജിപ്പിച്ചെടുക്കണം.
ഇനി അടച്ചുവെച്ച് ഇത് വേവിച്ചെടുക്കാം. ഇടയ്‌ക്കിടെ തുറന്നു ഇളക്കാൻ മറക്കരുത്. വെന്തു കഴിഞ്ഞതിനുശേഷം ഇതിലേക്ക് അല്പം ഉലുവ വറുത്തു പൊടിച്ചതും അല്പം കായപ്പൊടിയും കൂടി ചേർത്തു കൊടുക്കണം. നല്ലതുപോലെ ഇളക്കി യോജിപ്പിച്ച് തണുക്കാനായി മാറ്റിവയ്‌ക്കാം. ശേഷം ഒരു ഗ്ലാസ് ബോട്ടിലിൽ ആക്കി സൂക്ഷിക്കാം.
