പുരുഷാധിപത്യം നിറഞ്ഞുനിന്ന മിമിക്രി കലാരംഗത്ത് ലേഡി സൂപ്പര്‍സ്റ്റാര്‍ ആയി മാറിയ സുബി സുരേഷ് വിടപറഞ്ഞിട്ട് ഇന്നേക്ക് ഒരു വര്‍ഷം. ടെലിവിഷന്‍ ചാനലുകളിലും സ്റ്റേജുകളിലുമായി ഒരുപാട് വേഷങ്ങളിലൂടെ ആരാധകരുടെ ഇഷ്ടതാരമായി മാറിയ നടിയായിരുന്നു സുബി സുരേഷ്. കോമഡി സ്‌കിറ്റുകള്‍ ചെയ്യുന്ന വനിത എന്ന നിലയില്‍ വളരെ വേഗത്തിൽ സുബി പ്രശസ്തി നേടി.
വിദേശരാജ്യങ്ങളിലും നിരവധി സ്റ്റേജ് ഷോകളില്‍ നിറസാന്നിധ്യമായിരുന്നു സുബി. സ്റ്റേജില്‍ തിളങ്ങിയ സുബി പിന്നീട് സിനിമയിലും അഭിനയിച്ചു. രാജസേനന്‍ സംവിധാനം ചെയ്ത കനക സിംഹാസനം ആണ് സുബി വേഷമിട്ട ആദ്യ ചിത്രം. എല്‍സമ്മ എന്ന ആണ്‍കുട്ടി, പഞ്ചവര്‍ണ്ണ തത്ത, ഡ്രാമ, ഹാപ്പി ഹസ്ബന്‍ഡ്‌സ്,101 വെഡിംങ്ങ് തുടങ്ങി ഇരുപതിലധികം മലയാള സിനിമകളില്‍ വേഷമിട്ടിട്ടുണ്ട്.
തൃപ്പൂണിത്തുറ സ്വദേശിയാണ് സുബി. തൃപ്പൂണിത്തുറ സര്‍ക്കാര്‍ സ്‌കൂളിലും, എറണാകുളം സെന്റ് തെരേസാസിലുമായിരുന്നു സ്‌കൂള്‍-കോളജ് വിദ്യാഭ്യാസം പൂര്‍ത്തിയാക്കിയത്. സ്‌കൂളിൽ പഠിക്കുമ്പോൾ തന്നെ നൃത്തം പഠിക്കാന്‍ തുടങ്ങി. ഡാൻസിലൂടെയാണ് വേദികളിലേക്കുള്ള അരങ്ങേറ്റം. തുടര്‍ന്ന് മിനിസ്‌ക്രീനിലെത്തിയ താരം അതിവേഗം ബിഗ് സ്‌ക്രീനിലേക്കും കയറി. അതിനിടെയിലാണ് കഠിനമായ കരള്‍രോഗത്തെ തുടര്‍ന്ന് ചികിത്സയിലായത്. തുടര്‍ന്ന് 2023 ഫെബ്രുവരി 24ന് മരണം സംഭവിക്കുകയായിരുന്നു.
