ഉണ്ണി മുകുന്ദനും മഹിമ നമ്പ്യാരും കേന്ദ്ര കഥാപാത്രങ്ങളായി എത്തുന്ന ഏറ്റവും പുതിയ ചിത്രമാണ് ‘ജയ് ഗണേഷ്’. വിഷു റിലീസിന് ഒരുങ്ങുന്ന ചിത്രത്തിന്റെ ഓരോ അപ്‌ഡേറ്റും ആരാധകർ ആവേശത്തോടെയാണ് സ്വീകരിച്ചത്. ഇപ്പോഴിതാ ചിത്രത്തിന്റെ ട്രെയ്‌ലർ പുറത്തുവിട്ടിരിക്കുകയാണ് അണിയറ പ്രവർത്തകർ. തിരുവനന്തപുരം ലുലുമാളിൽ വച്ച് നടന്ന ചടങ്ങിലാണ് ജയ് ഗണേഷിന്റെ ട്രെയ്‌ലർ ലോഞ്ച് നടന്നത്.
രഞ്ജിത് ശങ്കറാണ് ചിത്രം സംവിധാനം ചെയ്യുന്നത്. ദിവ്യാംഗനായ ഗ്രാഫിക് ഡിസൈനറുടെ വേഷത്തിലാണ് ഉണ്ണി മുകുന്ദൻ എത്തുന്നത്. നിധി എന്ന ശക്തമായ നായിക കഥാപാത്രത്തെയാണ് ചിത്രത്തിൽ മഹിമ നമ്പ്യാർ അവതരിപ്പിക്കുന്നത്. ഒരിടവേളക്ക് ശേഷം ജോമോളും ചിത്രത്തിൽ ശക്തമായ ഒരു കഥാപാത്രത്തെ അവതരിപ്പിക്കുന്നുണ്ട്. ഉണ്ണി മുകുന്ദൻ ഫിലിംസും രഞ്ജിത്ത് ശങ്കറിന്റെ ഡ്രീംസ് എൻ ബിയോണ്ടും ചേർന്നാണ് ചിത്രം നിർമ്മിക്കുന്നത്.
ആരാധകർക്ക് മികച്ച ചലച്ചിത്ര അനുഭവം നൽകുന്ന പ്രകടനമാണ് ഉണ്ണി മുകുന്ദൻ ചിത്രത്തിൽ കാഴ്ച വച്ചിരിക്കുന്നതെന്ന് ട്രെയ്‌ലർ സൂചന തരുന്നു. സസ്‌പെൻസ് ത്രില്ലർ ജോണറിൽ ഒരുങ്ങുന്ന ചിത്രത്തിൽ ഹരീഷ് പേരടി, അശോകൻ, രവീന്ദ്ര വിജയ്, നന്ദു തുടങ്ങിയവരും പ്രധാന വേഷങ്ങളിലെത്തുന്നു. ചിത്രത്തിന്റെ ഛായാഗ്രഹണം ചന്ദ്രു ശെൽവരാജാണ് നിർവ്വഹിക്കുന്നത്.
