നടൻ ഇടവേള ബാബു അഭിനേതാക്കളുടെ സംഘടനയായ അമ്മയുടെ ഭാരവാഹി സ്ഥാനം ഒഴിയാൻ ഒരുങ്ങുന്നു. അദ്ദേഹം സ്ഥാനത്ത് നിന്ന് ഒഴിയുന്നത് നിരവധി കമ്മിറ്റികൾ ഉണ്ടെങ്കിലും സംഘടനാഭാരം ഒറ്റയ്ക്ക് ചുമക്കേണ്ടി വരുന്നു എന്നത് മൂലമാണ് എന്നാണ് സൂചന. നിലവിൽ സംഘടനയുടെ ജനറൽ സെക്രട്ടറിയാണ്, കാൽ നൂറ്റാണ്ടായി വിവിധ സ്ഥാനങ്ങളിലായി അമ്മയെ നയിച്ച ഇടവേള ബാബു. പ്രസിഡന്റ് സ്ഥാനം ഒഴിയാൻ നടൻ മോഹൻലാലും സന്നദ്ധത അറിയിച്ചിട്ടുണ്ടെന്നാണ് സൂചന.
വലിയ സ്ഥാനമാറ്റങ്ങൾ ഈ മാസം നടക്കുന്ന പൊതുയോഗത്തിൽ വെച്ചുണ്ടാകാം. ഇടവേള ബാബു കഴിഞ്ഞ തവണയും സ്ഥാനമൊഴിയാൻ താല്പര്യം പ്രകടിപ്പിച്ചിരുന്നു. എന്നാൽ അദ്ദേഹം മമ്മൂട്ടിയുടെ നിർബന്ധത്തെ തുടർന്ന് തീരുമാനം മാറ്റുകയായിരുന്നു. മമ്മൂട്ടിയും മോഹൻലാലും ചേർന്ന് 24 വർഷം അമ്മയുടെ സെക്രട്ടറി, ജനറൽ സെക്രട്ടറി സ്ഥാനത്ത് നിന്ന് സംഘടനയെ നയിച്ചതിന് ഇടവേള ബാബുവിനെ പൊതുയോഗത്തിൽ വെച്ച് ആദരിച്ചിരുന്നു.അതേസമയം അമ്മയുടെ പൊതുയോഗം നടക്കുക ജൂൺ 30ന് കൊച്ചി ഗോകുലം കൺവെൻഷൻ സെന്ററിൽ വെച്ചാണ്. സംഘടനയില് വോട്ടവകാശമുള്ളത് 506 അംഗങ്ങൾക്കാണ്. പത്രികകൾ ജൂൺ മൂന്നുമുതൽ സ്വീകരിക്കും.