ആലപ്പുഴ: പ്രതിപക്ഷ നേതാവ് വി.ഡി.സതീശനെ രൂക്ഷമായി വിമര്‍ശിച്ച് മുഖ്യമന്ത്രി പിണറായി വിജയന്‍. കേന്ദ്ര സര്‍ക്കാരിന്റെ തെറ്റായ നടപടികള്‍ക്കെതിരെ ഒന്നിച്ച് പോരാടാന്‍ തയ്യാറാകാത്ത പ്രതിപക്ഷ നേതാവ് പി.കെ.കുഞ്ഞാലിക്കുട്ടിയെ മാതൃകയാക്കണമെന്നും മുഖ്യമന്ത്രി പറഞ്ഞു. ഈ നാടിനെതിരായി തങ്ങളെന്ത് ചെയ്തിട്ടുണ്ട്. മാധ്യമങ്ങള്‍ എന്തുകൊണ്ടാണ് പ്രതിപക്ഷത്തിന്റെ നിഷേധാത്മക സമീപനത്തെ കുറിച്ച് പറയാത്തതെന്നും മുഖ്യമന്ത്രി ചോദിച്ചു. നവകേരള സദസ്സിന്റെ ഭാഗമായി ആലപ്പുഴയില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു മുഖ്യമന്ത്രി.
‘ആരോഗ്യകരമായ ബന്ധം ഉണ്ടാക്കാന്‍ എത്ര ശ്രമിച്ചാലും അനാരോഗ്യകരമായ ബന്ധമേ ഉണ്ടാക്കൂ എന്ന് ചിന്തിച്ച് നടക്കുന്നയാളുകളുണ്ട്. അല്ലെങ്കില്‍ ഇന്നത്തെ അവസ്ഥയില്‍ നവകേരള യാത്രയുടെ മുന്നിലേക്ക് കരിങ്കൊടിയുമായിട്ട് വരുമോ. ഇന്നെന്താ അന്തരീക്ഷം, കേന്ദ്ര സര്‍ക്കാര്‍ കാണിക്കുന്ന തെറ്റായ നടപടിക്കെതിരെ നമ്മുടെ സംസ്ഥാനം സുപ്രീംകോടതിയിലടക്കം പോയിരിക്കുകയാണ്. ഇതുമായി സഹകരിക്കാന്‍ തയ്യാറാകണമെന്ന് പ്രതിപക്ഷത്തോട് പ്രത്യേകമായി അഭ്യര്‍ത്ഥിച്ചു. ആ ആഭ്യര്‍ത്ഥന വന്നപ്പോള്‍ പ്രതിപക്ഷ നേതാവ് പറഞ്ഞത് നിങ്ങളുമായി ഒരു ബന്ധവും യോജിപ്പുമില്ലെന്നാണ്. അതാണോ സ്വീകരിക്കേണ്ട സമീപനം. ഇത് നാടിന്റെ പ്രശ്‌നമല്ലേ. നാടിന് വേണ്ടിയല്ലേ. ഏതെങ്കിലും ഒരു പാര്‍ട്ടിക്കോ മുന്നണിക്കോ വേണ്ടയില്ല. നമ്മുടെ നാടിന് കിട്ടേണ്ട പണം കിട്ടാതിരിക്കുന്ന ഈ ഒരു വര്‍ഷം മാത്രം ബാധിക്കുന്ന കാര്യമല്ല. അത് കൂറേ വര്‍ഷങ്ങളിലേക്ക് ബാധിക്കും.
