സാനിറ്ററി പാഡുകളിൽ നിന്നും പുതുതലമുറ അതിവേഗം മെൻസ്ട്രൽ കപ്പിലേക്ക് മാറിക്കൊണ്ടിരിക്കുകയാണ്. മെൻസ്ട്രൽ കപ്പ് ഉപയോഗിക്കണം എന്ന് ആഗ്രഹമുണ്ടെങ്കിലും പലവിധ കാരണങ്ങളാൽ ചിലർ അതിൽ നിന്നും വിട്ടുനിൽക്കുന്നു.
ഉത്കണ്ഠയും പേടിയുമാണ് ചിലരെ മെൻസ്ട്രൽ കപ്പ് ഉപയോഗിക്കുന്നതിൽ നിന്നും പിന്നോട്ട് വലിക്കുന്നത്. മെൻസ്ട്രൽ കപ്പ് ഉപയോഗിക്കുന്നത് ശരീരത്തിന് ദോഷമാണെന്ന് കരുതുന്നവരും കുറവല്ല. എന്നാൽ സാനിറ്ററി പാഡുകൾ ഉപയോഗിക്കുന്നതിനേക്കാൾ സുരക്ഷിതമാണ് മെൻസ്ട്രൽ കപ്പ് ഉപയോഗിക്കുന്നത്.
പരിസ്ഥിതി സൗഹൃദവും പോക്കറ്റ് ഫ്രണ്ട്ലിയുമായ കപ്പ് ഉപയോഗിക്കുന്നത് പാഡ് ഉപയോഗിക്കുന്നതുമൂലം ഉണ്ടാകുന്ന അണുബാധയിൽ നിന്നും നമ്മെ സംരക്ഷിക്കുന്നു. സ്മാൾ, മീഡിയം, ലാർജ് എന്നീ സൈസുകളിൽ ലഭ്യമാകുന്ന മെൻസ്ട്രൽ കപ്പുകൾ പ്രായം, ലൈംഗിക ബന്ധം, പ്രസവം എന്നിവയെ അടിസ്ഥാനമാക്കി തിരഞ്ഞെടുക്കാവുന്നതാണ്.
ആർത്തവ ദിവസങ്ങളിൽ ഏകദേശം 12 മണിക്കൂർ വരെ ഒറ്റ സ്ട്രച്ചിൽ കപ്പ് ഉപയോഗിക്കാൻ സാധിക്കും. ഒരു തവണ വാങ്ങിയാൽ ഏകദേശം അഞ്ചു മുതൽ 10 വർഷം വരെ ഉപയോഗിക്കാവുന്ന കപ്പ് ഓരോ തവണ ഉപയോഗത്തിന് മുൻപും ശേഷവും അണവിമുക്തമാക്കാനും ശ്രദ്ധിക്കണം. സാനിറ്ററി പാഡുകൾ ഉപയോഗിക്കുമ്പോൾ ഉണ്ടാകുന്ന അസ്വസ്ഥതകൾ ഇല്ലാതാക്കുന്നതിനും മെൻസ്ട്രൽ കപ്പ് ഉപയോഗത്തിലൂടെ സാധിക്കും.
