ഉപഭോക്താക്കള്ക്ക് നല്കുന്ന അണ്ലിമിറ്റഡ് 5ജി ഡാറ്റ പ്ലാനുകള് ജിയോയും എയര്ടെലും പിന്വലിക്കുന്നുയെന്ന് റിപ്പോർട്ടുകൾ. 2024 പകുതിയോടെ 4ജി നിരക്കുകളെക്കാള് അഞ്ചോ പത്തോ ശതമാനം അധികം തുക 5ജി പ്ലാനുകള്ക്ക് കമ്പനികള് ഈടാക്കുമെന്നും റിപ്പോര്ട്ടുകളിൽ പറയുന്നുണ്ട്. അനലിസ്റ്റുകളെ ഉദ്ധരിച്ച് എക്കോണമിക് ടൈംസാണ് ഇത് റിപ്പോര്ട്ട് ചെയ്തിരിക്കുന്നത്.
5ജി അടിസ്ഥാന സൗകര്യ വികസനത്തിനും ഉപഭോക്താക്കളെ ഏറ്റെടുക്കുന്നതിനും ചിലവാക്കിയ തുക തിരിച്ചുപിടിക്കുന്നതിന്റെ ഭാഗമായാണിത്. സെപ്റ്റംബറോടെ ജിയോയും എയര്ടെലും മൊബൈല് താരിഫ് നിരക്കുകള് 20 ശതമാനത്തോളം വര്ധിപ്പിക്കാനിടയുണ്ടെന്നാണ് റിപ്പോര്ട്ട് പറയുന്നത്.
നിലവിലുള്ള ഉപയോക്താക്കളെ ആകര്ഷിക്കുന്നതിനായി ഏകദേശം ഒരു വര്ഷമായ ജിയോയും എയർടെല്ലും 4ജി നിരക്കില് 5ജി സേവനങ്ങളും പരിധിയില്ലാത്ത ഡേറ്റ ഓഫറുകളും നല്കിവരികയാണ്. ജിയോയ്ക്കും എയര്ടെലിനും ഇതിനകം ഏകദേശം 12.5 കോടി 5ജി വരിക്കാരുണ്ട്.