സംവിധായകൻ എസ്. എസ് രാജമൗലിയുടെ മകൻ എസ് എസ് കാർത്തികേയ ആദ്യമായി നിർമിക്കുന്ന ചിത്രങ്ങളിൽ ഫഹദ് ഫാസിൽ നായകനാകുന്നു. രണ്ട് സിനിമകളുടെ പ്രഖ്യാപനമാണ് കാർത്തികേയ നടത്തിയത്. ഓക്സിജൻ, ഡോണ്ട് ട്രബിൾ ദി ട്രബിൾ എന്നിവയാണ് കാർത്തികേയയുടെ നിർമ്മാണത്തിൽ ഒരുങ്ങുന്ന ചിത്രങ്ങൾ.രാജമാൗലി അവതരിപ്പിക്കുന്ന ചിത്രങ്ങൾ തെലുങ്ക്, മലയാളം, കന്നഡ, തമിഴ് ഭാഷകളിലാണ് റിലീസ് ചെയ്യുക. സിദ്ധാർഥ് നദെല്ലയാണ് ഓക്സിജൻ സംവിധാനം ചെയ്യുന്നത്. കാല ഭെെരവയാണ് സംഗീതം നൽകുന്നത്.
ശശാങ്ക് യലേതിയാണ് ഡോണ്ട് ട്രബിൾ ദി ട്രബിൾ സംവിധാനം ചെയ്യുന്നത്. ഈ ചിത്രത്തിനും സംഗീതമൊരുക്കുന്നത് കാല ഭെെരവയാണ്. രണ്ട് ചിത്രങ്ങളുടെയും ചിത്രീകരണം ഈ വർഷം ആരംഭിക്കും. അല്ലു അർജുൻ നായകനായെത്തിയ പുഷ്പയ്‌ക്ക് ശേഷം പാൻ ഇന്ത്യൻ തലത്തിൽ ഫഹദ് ഫാസിൽ വലിയ രീതിയിൽ ശ്രദ്ധിക്കപ്പെട്ടിരുന്നു. പുഷ്പ 2 വിന്റെ വർക്കുകളും പുരോഗമിക്കുകയാണ്.നേരത്തെ നസ്ലൻ ‘പ്രേമലു‘വിന്റെ തെലുങ്ക് പതിപ്പിന്റെ വിതരണം കാർത്തികേയ ഏറ്റെടുത്തിരുന്നു. ഭീമമായ തുകയ്‌ക്കാണ് ചിത്രത്തിന്റെ തെലുങ്ക് പതിപ്പിന്റെ അവകാശം കാർത്തികേയ സ്വന്തമാക്കിയതെന്നായിരുന്നു റിപ്പോർട്ടുകൾ. പ്രേമലു തെലുങ്ക് ഡബ്ബ്ഡ് വേർഷൻ കഴിഞ്ഞ ആഴ്ചയിലാണ് പുറത്തിറങ്ങിയത്, മികച്ച പ്രേക്ഷക പ്രതികരണമാണ് ചിത്രത്തിന് ആന്ധ്രയിലും തെലങ്കാനയിലും ലഭിച്ചുകൊണ്ടിരിക്കുന്നത്.
