കുഞ്ചാക്കോ ബോബൻ കേന്ദ്ര കഥാപാത്രമായ എത്തുന്ന ‘ഗർർർ’ എന്ന ചിത്രത്തിന്റെ ടീസർ പുറത്തിറങ്ങി. ഒട്ടനവധി ചിരി മുഹൂർത്തങ്ങൾ ഉൾക്കൊള്ളിച്ചു കൊണ്ടാണ് ചിത്രത്തിന്റെ ടീസർ പുറത്തിറങ്ങിയിരിക്കുന്നത്. യഥാർത്ഥ സംഭവത്തെ ആസ്പദമാക്കി ജയ് കെ സംവിധാനം ചെയ്യുന്ന ചിത്രത്തിൽ കുഞ്ചാക്കോ ബോബനും സുരാജ് വെഞ്ഞാറമൂടുമാണ് കേന്ദ്ര കഥാപാത്രങ്ങളായി എത്തുന്നത്.
തമിഴ് നടൻ ആര്യയും ഷാജി നടേശനും ചേർന്ന് നിർമ്മിക്കുന്ന ചിത്രത്തിന്റെ സഹ നിർമ്മാതാവായി സിനി ഹോളിക്സ് എത്തുന്നു. ഒരു മുഴുനീള എന്റർടൈനറായി നിർമ്മിച്ചിരിക്കുന്ന ചിത്രത്തിൽ സിംഹ കൂട്ടിലേക്ക് എടുത്തു ചാടുന്ന ഒരു യുവാവിന്റെ കഥയാണ്‌ പറയുന്നത്. യഥാർത്ഥത്തിൽ തിരുവനന്തപുരം മൃഗശാലയിൽ ദർശൻ എന്ന യുവാവ് സിംഹ കൂട്ടിലേക്ക് ചാടിയ സംഭവത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്.
കുഞ്ചാക്കോ ബോബനാണ് ചിത്രത്തിൽ ദർശൻ എന്ന യുവാവായി വേഷമിടുന്നത്. ജയേഷ് നായർ ഛായാഗ്രഹണം നിർവഹിച്ചിരിക്കുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് സംവിധായകൻ ജയ് കെയും പ്രവീൺ എസും ചേർന്നാണ്. ചിത്രത്തിന്റെ പ്രൊഡക്ഷൻ ഡിസൈനിങ് നിർവഹിച്ചിരിക്കുന്നത് രതീഷ് ബാലകൃഷ്ണൻ പൊതുവാൾ ആണ്.
