പാലക്കാട്: പാലക്കാട് ധോണി മേഖലയിൽ ആശങ്കയുണർത്തുന്ന പിടി 7 കൊമ്പനെ പിടികൂടാനുള്ള ദൗത്യം തുടങ്ങി. പുലർച്ചെ അഞ്ച് മണിയോടെ ദൗത്യത്തിനു തയ്യാറെടുത്തെങ്കിലും ആറരയോടെയാണ് ഇവർ വനത്തിൽ പ്രവേശിച്ചത്. ധോണി കോർമയ്ക്കടുത്തുള്ള അരിമണി പ്രദേശത്ത് ആനയെ കണ്ടെത്തിയതോടെയാണ് ദൗത്യം ആരംഭിച്ചത്. രണ്ട് സംഘമായി തിരിഞ്ഞാണ് ദൗത്യത്തിന് ഇറങ്ങുന്നത്.
ആദ്യ സംഘം ആനയെ ട്രാക്ക് ചെയ്ത് ഇപ്പോൾ ആന നിൽക്കുന്ന സ്ഥലം മയക്കുവെടിവയ്ക്കാൻ അനുയോജ്യമാണോയെന്ന് പരിശോധിക്കും. കാട്ടിലോ ജനവാസ മേഖലയിലോ വച്ച് ആനയെ വെടിവയ്ക്കില്ല. ആന വനാതിർത്തിയിൽ പ്രവേശിച്ചാലുടൻ ഷൂട്ട് ചെയ്യാനാണ് സംഘം പദ്ധതിയിടുന്നത്. മയക്കുവെടിവയ്ക്കാൻ ഡോ.അരുൺ സക്കറിയയെയും ഫോറസ്റ്റ് സ്റ്റേഷനിൽ സജ്ജനായി കഴിഞ്ഞു.
കാട്ടിൽ നിന്ന് ആന ഇറങ്ങിയാലുടൻ രണ്ടാമത്തെ സംഘത്തെ രംഗത്തിറക്കി മരുന്ന് വെടിവയ്ക്കാനാണ് നീക്കം. കുങ്കിയാനകളെ ഇറക്കാതെ തന്നെ മയക്കുവെടി വയ്ക്കാനാണ് പദ്ധതി. വിദഗ്ദ്ധരുടെ അഭിപ്രായത്തിൽ, വെടിയേറ്റ് 45 മിനിറ്റിനുള്ളിൽ മാത്രമേ ആന മയങ്ങൂ. ഇത്രയും സമയത്തിനുള്ളിൽ ആനകൾ 7.5 കിലോമീറ്റർ വരെ ഓടിയ ചരിത്രമുണ്ട്. അതിനാൽ ജനവാസ മേഖലയിലേക്കോ മറ്റോ നീങ്ങുന്ന പക്ഷം ആന നീങ്ങിയാൽ കുങ്കി ആനകളെ ഇറക്കി കൊമ്പനെ നിയന്ത്രണത്തിലാക്കുക എന്നതാണ് വനംവകുപ്പിന്‍റെ തന്ത്രം. ആനയെ കണ്ടെത്തിയ അരിമണി പ്രദേശം ധോണി ഫോറസ്റ്റ് സ്റ്റേഷന് സമീപമാണ്. ഇത് പൂർണ്ണമായും ജനവാസമില്ലെങ്കിലും വ്യാപകമായി കൃഷി ചെയ്യുന്ന സ്ഥലമാണ്. ആദ്യ സംഘത്തിന്‍റെ നിർദ്ദേശത്തിനായി രണ്ടാമത്തെ സംഘം ഇപ്പോൾ ഫോറസ്റ്റ് സ്റ്റേഷനിൽ കാത്തിരിക്കുകയാണ്. ദൗത്യം ആരംഭിച്ചുകഴിഞ്ഞാൽ, അഞ്ച് സംഘമായി പിരിഞ്ഞാവും ബാക്കി നീക്കങ്ങൾ.
