മുടികൊഴിച്ചിൽ പലരേയും അലട്ടുന്ന പ്രശ്നമാണ്. മുടിയുടെ ആരോഗ്യത്തെ ബാധിക്കുന്ന ഒട്ടേറെ കാര്യങ്ങളുണ്ട്. പോഷകക്കുറവ്, പാരമ്പര്യഘടങ്ങൾ, മാസികസംഘർഷം, ഹോർമോൺതകരാറുകൾ കാരണമുള്ള രോഗങ്ങൾ, മറ്റ് ചില ആന്തരിക രോഗങ്ങൾ, താരൻ എന്നിങ്ങനെ പല കാരണങ്ങൾ അതിൽ ഉൾപ്പെടും.
മുടികൊഴിച്ചിലിന് ഉലുവയും നെല്ലിക്കയും
ഇരുമ്പിന്റെയും പ്രോട്ടീനിന്റെയും സമ്പന്നമായ ഉറവിടമാണ് ഉലുവ. ഇത് മുടിയെ കൂടുതൽ ശക്തിപ്പെടുത്തും. ഡിഎച്ച്ടി (ഡൈ ഹൈഡ്രോ ടെസ്റ്റോസ്റ്റിറോൺ) കുറയ്‌ക്കുന്നതിലൂടെ മുടികൊഴിച്ചിൽ കുറയ്‌ക്കാൻ ഉലുവ പേസ്റ്റ് സഹായിക്കുന്നു. താരൻ, മുടി പൊട്ടിപോകുന്നത് എന്നിവ തടയാൻ സഹായിക്കുന്ന ആന്റിഓക്‌സിഡന്റും ആൻറി-ഇൻഫ്ലമേറ്ററി ഗുണങ്ങളും ഉലുവയിലുണ്ട്. മുടിയുടെ ആരോഗ്യത്തിനായി ഉലുവ പേസ്റ്റ് തയ്യാറാക്കാം…
ഉലുവ പേസ്റ്റ് തയ്യാറാക്കുന്ന വിധം…
ഉലുവ രാത്രി മുഴുവൻ വെള്ളത്തിൽ കുതിർക്കാൻ വയ്‌ക്കുക. മിക്സിയിൽ അരച്ചെടുത്ത് മുടിയിലും തലയോട്ടിയിലും നന്നായി തേച്ച് പിടിപ്പിക്കുക. 20 മിനുട്ട് ഇത് തലയിൽ വെക്കുക. ശേഷം തണുത്ത വെള്ളത്തിൽ കഴുകി കളയുക. രണ്ടാഴ്ചയിലൊരിക്കൽ ഇങ്ങനെ ചെയ്യാം.
നെല്ലിക്ക ശരീര ആരോഗ്യത്തിന് മാത്രമല്ല, മുടിക്കും വളരെ നല്ലതാണ്. നെല്ലിക്ക പതിവായി കഴിക്കുന്നത് മുടിക്ക് ബലം നൽകുകയും മുടി കൊഴിച്ചിലും നരയും തടയുകയും ചെയ്യുന്നു. നെല്ലിക്കയിൽ അടങ്ങിയിരിക്കുന്ന ഫൈറ്റോ ന്യൂട്രിയന്റുകൾക്കൊപ്പം വിറ്റാമിനുകളും ധാതുക്കളും തലയോട്ടിയിലെ രക്തചംക്രമണം കൂട്ടുന്നു, ഇത് മുടിയുടെ വളർച്ചയെ ഉത്തേജിപ്പിക്കുന്നു.
നെല്ലിക്ക പേസ്റ്റ് തയ്യാറാക്കുന്ന വിധം…
നെല്ലിക്ക പൊടിയിൽ നാരങ്ങ നീര് ചേർത്ത് പേസ്റ്റ് രൂപത്തിലാക്കുക. തലയോട്ടിയിലും മുടിയിലും തേച്ചുപിടിപ്പിക്കുക. 15 മിനുട്ടിന് ശേഷം തണുത്ത വെള്ളത്തിൽ കഴുകി കളയുക.
