ഹോട്ടലുകളുടെ ഗൂഗിൾ ബിസിനസ്‌ പേജുകളിൽ സൈബർ ആക്രമണം. മുറി ബുക്ക്‌ ചെയ്‌തവർക്ക്‌ ലക്ഷങ്ങൾ നഷ്‌ടമായെന്നാണ്‌സൂചന .
കേരളത്തിൽ വ്യാപകമായി ഇത്തരത്തിലുള്ള തട്ടിപ്പ്‌ നടന്നതായി സൈബർ സെൽ സംശയിക്കുന്നു.
എറണാകുളം ബോൾഗാട്ടി പാലസിന്റെ ഗൂഗിൾ ബിസിനസ്‌ പേജിലുണ്ടായ ആക്രമണത്തിൽ 36 പേർ കബളിപ്പിക്കപ്പെട്ടതായാണ്‌ ഇതുവരെയുള്ള വിവരം. ബിസിനസ്‌ പേജിൽനിന്ന്‌ വെബ്‌സൈറ്റിലേക്കുള്ള ലിങ്കിൽ തിരിമറി നടത്തിയാണ്‌ തട്ടിപ്പ്‌.
ലിങ്കിൽ ക്ലിക് ചെയ്‌തവർക്ക്‌ ഹാക്കർമാർ വ്യാജമായി തയ്യാറാക്കിയ വെബ്‌സൈറ്റാണ്‌ ലഭ്യമായത്‌. ഇതിലെ ഫോൺ നമ്പറിൽ ബന്ധപ്പെട്ടപ്പോൾ ഹിന്ദിയിലായിരുന്നു സംസാരം. അവിടെനിന്നുള്ള നിർദേശം അനുസരിച്ച്‌ ഓൺലൈനിൽ പണം നൽകിയവരാണ്‌ കബളിപ്പിക്കപ്പെട്ടത്‌. ഇങ്ങനെയുള്ളവർ ബോൾഗാട്ടിയിൽ എത്തിയപ്പോഴാണ്‌ കെടിഡിസി അധികൃതർ വിവരം അറിയുന്നത്‌. തുടർന്ന്‌ സൈബർ സെല്ലിൽ പരാതി നൽകി.
ഗുജറാത്തിൽനിന്ന്‌ വ്യാജപ്പേരിൽ എടുത്ത സിം ഉപയോഗിച്ച്‌ രാജസ്ഥാനിൽനിന്നാണ്‌ തട്ടിപ്പു നടത്തിയതെന്ന്‌ അന്വേഷണത്തിൽ വ്യക്‌തമായത്‌.
