ടെല്‍ അവീവ്: ഇസ്രയേല്‍-ഹമാസ് സംഘര്‍ത്തില്‍ ഇസ്രയേല്‍ ആക്രമണത്തില്‍ 2450 പേര്‍ കൊല്ലപ്പെട്ടതായി പലസ്തീന്‍ ആരോഗ്യമന്ത്രാലയം. ആക്രമണത്തില്‍ 9,200 പേര്‍ക്ക് പരിക്കേറ്റിട്ടുണ്ടെന്നും ആരോഗ്യ മന്ത്രാലയം പുറത്ത് വിട്ട പ്രസ്താവനയില്‍ അറിയിച്ചിട്ടുണ്ട്. അതേസമയം, ഹമാസ് നടത്തിയ ആക്രമണത്തില്‍ ഇസ്രയേലില്‍ 1,400 പേര്‍ കൊല്ലപ്പെട്ടതായി ഇസ്രയേല്‍ പ്രധാനമന്ത്രി ബഞ്ചമിന്‍ നെതന്യാഹുവിന്റെ ഓഫീസും അറിയിച്ചു.
യുദ്ധം രൂക്ഷമായിരിക്കുന്ന ഗാസയിലേക്കുള്ള ജലവിതരണം ഭാഗികമായി പുനസ്ഥാപിച്ചുവെന്ന ഇസ്രയേലിന്റെ വാദം ഗാസ അധികൃതര്‍ സ്ഥിരീകരിച്ചില്ലെന്ന് ഞായറാഴ്ച റിപ്പോര്‍ട്ട് പുറത്ത് വന്നിരുന്നു.എന്നാല്‍ തെക്കന്‍ ഗാസയിലേക്കുള്ള ജലവിതരണം പുനസ്ഥാപിച്ചതായി ഇസ്രയേല്‍ ഊര്‍ജ മന്ത്രി ഇസ്രയേല്‍ കാട്സ് പറഞ്ഞു. ഇതിനു പിന്നാലെ ജലവിതരണം ഭാഗികമായി പുനസ്ഥാപിച്ചെന്ന് ഇസ്രയേല്‍ അറിയിച്ചതായി വാര്‍ത്താ മാധ്യമത്തിന് നല്‍കിയ അഭിമുഖത്തില്‍ യുഎസ് ദേശീയ സുരക്ഷാ ഉപദേഷ്ടാവ് ജെയ്‌ക്ക് സള്ളിവനും പറഞ്ഞിരുന്നു.
