തമിഴിലെ പ്രശസ്ത ഹാസ്യതാരം റെഡിന്‍ കിംഗ്സ്ലി വിവാഹിതനായി. സിനിമ-സീരിയല്‍ നടിയും മോഡലുമായ സംഗീതയാണ് വധു. അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്ത ലളിതമായ ചടങ്ങായിരുന്നു. സംവിധായകന്‍ നെല്‍സണ്‍ ദിലീപ് കുമാറിന്റെ കോലമാവ് കോകില എന്ന ചിത്രത്തിലൂടെയാണ് റെഡിന്‍ വെള്ളിത്തിരയില്‍ തുടക്കംകുറിച്ചത്. പിന്നീട് അങ്ങോട്ട് നെല്‍സന്റെ സിനിമകളിലെ സ്ഥിര സാന്നിധ്യമായിരുന്നു.
ശിവകാര്‍ത്തികേയന്‍ നായകനായെത്തിയ ഡോക്ടറിലൂടെയാണ് താരം അറിയപ്പെട്ടു തുടങ്ങിയത്. ഹാസ്യ രംഗങ്ങളിലെ ശ്രദ്ധേയമായ പ്രകടനവും ഡയലോഗ് ഡെലിവറിയിലെ വ്യത്യസ്തതയുമാണ് റെഡിനെ സംവിധായകര്‍ക്കും പ്രേക്ഷകര്‍ക്കും പ്രിയങ്കരനാക്കിയത്.
ബീസ്റ്റ്, അണ്ണാത്തെ, കാത്തുവാക്കുല രണ്ട് കാതല്‍, പത്ത് തല, ജയിലര്‍, എല്‍കെജി, ഗൂര്‍ഖ, മാര്‍ക് ആന്റണി തുടങ്ങിയ ചിത്രങ്ങളില്‍ അഭിനയിച്ചു. നയന്‍താര നായികയായ അന്നപൂരണി, സതീഷ് നായകനായ കോണ്‍ജ്വറിങ് കണ്ണപ്പ എന്നീ ചിത്രങ്ങളിലാണ് റെഡിന്റെ അടുത്തിടെയായി ഇറങ്ങിയ ചിത്രങ്ങള്‍.
സണ്‍ ടിവിയിലൂടെ പ്രേക്ഷകര്‍ക്ക് മുന്നിലെത്തിയ ആനന്ദരാഗം എന്ന പരമ്പരയിലൂടെയാണ് സംഗീത ശ്രദ്ധേയയായത്. ലോകേഷ് കനഗരാജ് സംവിധാനം ചെയ്ത മാസ്റ്റര്‍, ഹേയ് സിനാമിക, വീട്ടില വിശേഷം, കപടധാരി എന്നീ ചിത്രങ്ങളിലും സംഗീത അഭിനയിച്ചിട്ടുണ്ട്. സമൂഹമാധ്യമങ്ങളില്‍ നിരവധിപേര്‍ ഇരുവര്‍ക്കും ആശംസകളുമായെത്തി.
