നാവായിക്കുളം : ദേശീയ പാതയിൽ നാവായിക്കുളം 28 ആം മൈലിൽ ഗ്യാസ് സിലിണ്ടർ കൊണ്ടുപോയ ലോറിയും പാഴ്സൽ ലോറിയും കൂട്ടിയിടിച്ചു അപകടം. ഇന്ന് രാവിലെ 11 മണി കഴിഞ്ഞ് 28 ആം മൈൽ മങ്കാട്ടുവാതുക്കൽ പെട്രോൾ പമ്പിനു അടുത്താണ് അപകടം നടന്നത്.തിരുവനന്തപുരം ഭാഗത്ത് നിന്നും പാരിപ്പള്ളി ഐഒസിയിലേക്ക് കാലി ഗ്യാസ് സിലിണ്ടറും കയറ്റി പോയ ലോറിയും കൊല്ലം ഭാഗത്ത് നിന്നും തിരുവനന്തപുരം ഭാഗത്തേക്ക്‌ പോയ പാഴ്സൽ ലോറിയുമാണ് കൂട്ടിയിടിച്ചത്. അപകടത്തിൽ ഗ്യാസ് സിലിണ്ടറും കയറ്റി വന്ന ലോറി ഡ്രൈവർ പാരിപ്പള്ളി സുധിയുടെ കാലുകൾ ഡ്രൈവർ ക്യാബിനിൽ കുടുങ്ങി. തുടർന്ന് കല്ലമ്പലം ഫയർ ഫോഴ്സ് എത്തി ഒന്നര മണിക്കൂറോളം പരിശ്രമിച്ചാണ് ഡ്രൈവറെ പുറത്തെടുത്തത്. തുടർന്ന് സുധിയെ പാരിപ്പള്ളി മെഡിക്കൽ കോളേജ് ആശുപത്രിയിലും തുടർ ചികിത്സയ്ക്കായി കൊല്ലം ആശ്രമം ആശുപത്രിയിലേക്ക് മാറ്റി. അടിയന്തിര ശസ്ത്രക്രിയയ്ക്ക് വിധേയമാക്കുമെന്നും ബന്ധപ്പെട്ടവർ ആറ്റിങ്ങൽ വാർത്ത ഡോട്ട്കോമിനെ അറിയിച്ചു. പാഴ്സൽ ലോറിയിലെ ഡ്രൈവർ നിസാര പരിക്കുകളോടെ രക്ഷപ്പെട്ടു. അപകടത്തെ തുടർന്ന് മണിക്കൂറോളം ഗതാഗതം തടസ്സപ്പെട്ടു. കല്ലമ്പലം പോലീസും ഫയർ ഫോഴ്സും നാട്ടുകാരും രക്ഷാപ്രവർത്തനങ്ങളിൽ പങ്കെടുത്തു.
You must be logged in to post a comment Login