വര്‍ക്കല: വര്‍ക്കല ജനാര്‍ദനസ്വാമി ക്ഷേത്രത്തിലെ ചക്രതീര്‍ഥക്കുളത്തില്‍ കുളിക്കുന്നതിനിടെ കാണാതായ യുവാവിന്റെ മൃതദേഹം കണ്ടെത്തി. വടശ്ശേരിക്കോണം ഞെക്കാട് നന്ദനത്തില്‍ ലിജിനാ(30)ണ് മരിച്ചത്. രണ്ടുദിവസങ്ങളിലായി ഏഴുമണിക്കൂറിലധികം തിരച്ചില്‍ നടത്തിയശേഷമാണ് മൃതദേഹം കണ്ടെത്തിയത്.
ശനിയാഴ്ച രാത്രി ഏഴരയോടെയാണ് ലിജിനെ കാണാതായത്. തുടര്‍ന്ന് പോലീസും അഗ്‌നിരക്ഷാസേനയും തിരച്ചില്‍ നടത്തിയിരുന്നു. ഞായറാഴ്ച രാവിലെ എട്ടുമുതല്‍ അഗ്‌നിരക്ഷാസേനയുടെ തിരുവനന്തപുരം ജില്ലാ സ്‌കൂബാ ടീം തിരച്ചില്‍ ആരംഭിച്ചു. ഉച്ചയ്ക്ക് രണ്ടുമണിയോടെ കുളത്തിന്റെ മധ്യഭാഗത്തുനിന്നാണ് മൃതദേഹം കണ്ടെത്തിയത്.
ശനിയാഴ്ച വൈകീട്ട് ജനാര്‍ദനപുരം ആല്‍ത്തറമൂട്ടില്‍ സുഹൃത്തുക്കളുടെ മുറിയിലെത്തിയ ലിജിന്‍ അവര്‍ക്കൊപ്പം സമയം ചെലവഴിച്ചിരുന്നു. വൈകീട്ട് ആറരയോടെ ഭാര്യ സാനിയെ വിളിച്ച് സിനിമയ്ക്ക് പോകാന്‍ വര്‍ക്കല ക്ഷേത്രത്തിനുസമീപം എത്താന്‍ പറഞ്ഞു. തുടര്‍ന്ന് മൊബൈല്‍ ഫോണ്‍ മുറിയില്‍വച്ചശേഷം ഭാര്യ വിളിച്ചാല്‍ ഫോണ്‍ എടുക്കണമെന്ന് സുഹൃത്തിനെ പറഞ്ഞേല്‍പ്പിച്ചിട്ടാണ് ലിജിന്‍ കുളിക്കാന്‍ പോയത്.
സുഹൃത്തുക്കള്‍ക്കൊപ്പം കുളത്തിന്റെ വടക്കേക്കരയില്‍നിന്ന് തൂമ്പിന്റെ ഭാഗം വരെ നീന്തിയശേഷം ലിജിന്‍ വീണ്ടും കുളത്തിലിറങ്ങിയെന്നും അതിനുശേഷം കാണാതായെന്നുമാണ് സുഹൃത്തുക്കള്‍ പോലീസിനോടു പറഞ്ഞത്. സുഹൃത്തുക്കളാണ് പോലീസിനെയും അഗ്‌നിരക്ഷാസേനയെയും വിവരമറിയിച്ചത്
You must be logged in to post a comment Login