കാസര്‍കോട്: ഇനി കാത്തിരിപ്പിന്റെ നാളുകള്‍. പിഴുതുനട്ട മാവ് തളിരിടുന്നതും പൂക്കുന്നതും കായ്ക്കുന്നതും കാത്ത്. പുനര്‍ജന്മത്തിന്റെ തിരുമധുരത്തിനുവേണ്ടി. ബുധനാഴ്ച കാസര്‍കോട് നഗരം സാക്ഷ്യംവഹിച്ചത് അപൂര്‍വ യജ്ഞത്തിനായിരുന്നു. പതിനാറുവര്‍ഷം മുന്‍പ് കവയിത്രി സുഗതകുമാരി നട്ട നാട്ടുമാവ് വേരോടെ പിഴുത് ഒന്നരക്കിലോമീറ്റര്‍ അപ്പുറത്തെ അടുക്കത്ത്ബയല്‍ ഗവ. യു.പി. സ്‌കൂള്‍ മുറ്റത്തേക്ക് മാറ്റി. ‘പയസ്വിനി’യെന്ന് കവയിത്രി പേരുചൊല്ലി വിളിച്ച മാവിന്റെ പറിച്ചുനടലിന് നൂറുകണക്കിന് പ്രകൃതിസ്‌നേഹികള്‍ സാക്ഷിയായി. മണ്ണിലേക്ക് ആഴ്ന്നിറങ്ങി വെള്ളവും വളവും വലിച്ചെടുക്കുന്ന ധമനികള്‍ക്കൊന്നും പരിക്കേല്‍പ്പിക്കാതെ ഹൃദയശസ്ത്രക്രിയപോലെ മണിക്കൂറുകള്‍ നീണ്ട പ്രയത്‌നം സഫലമാവുകയായിരുന്നു.
ചുവട്ടിലെ മണ്ണുനീക്കി ശാഖകള്‍ വെട്ടിയൊതുക്കിയ മാവിനെ ക്രെയിനില്‍ പൊക്കിയെടുക്കാന്‍ ശ്രമിച്ചെങ്കിലും നടന്നില്ല. ഒടുവില്‍ മണ്ണുനീക്കിയന്ത്രം കൊണ്ടുവന്ന് വേരോടെ പിഴുതെടുത്താണ് പുതിയ സ്ഥലത്തേക്ക് എത്തിച്ചത്. അടുക്കത്ത്ബയല്‍ സ്‌കൂള്‍ കവാടത്തില്‍ പുഷ്പവൃഷ്ടിയോടും ഹര്‍ഷാരവത്തോടും കൂടിയാണ് വിദ്യാര്‍ഥികളും രക്ഷിതാക്കളും അധ്യാപകരും ‘പയസ്വിനി’യെ വരവേറ്റത്. സുഗതകുമാരിയുടെ കവിതകളും അന്തരീക്ഷത്തില്‍ മുഴങ്ങി. മഴയും വെയിലും മാറിനിന്ന അന്തരീക്ഷത്തില്‍ ഉച്ചയ്ക്ക് രണ്ടുമണിയോടെയാണ് മാവിന്റെ പറിച്ചുനടല്‍ പൂര്‍ത്തിയായത്.
You must be logged in to post a comment Login