അറ്റ്ലി സംവിധാനം ചെയ്യുന്ന ഷാരൂഖ് ഖാൻ – നയൻതാര ചിത്രം ‘ജവാൻ’ ഷൂട്ടിംഗ് പുരോഗമിക്കുകയാണ്. ‘ലേഡി സൂപ്പർസ്റ്റാർ 75’ ആദ്യ ഷെഡ്യൂൾ പൂർത്തിയാക്കി ജവാൻ ചിത്രീകരണത്തിലാണ് നയൻസ് ഇപ്പോൾ.
ബാന്ദ്ര കോട്ടയിൽ ഗാനരംഗങ്ങൾ ചിത്രീകരിക്കുകയാണ് സംഘം. ഒരു പാട്ടുകൂടി ചിത്രീകരിച്ചാൽ ജവാൻ പൂർത്തിയാകും എന്നാണ് വിവരം. ‘പഠാന്റെ’ വിജയം ഷാരൂഖ് സിനിമകൾക്ക് മേലുള്ള പ്രേക്ഷകരുടെ പ്രതീക്ഷ വാനോളം ഉയർത്തിയിട്ടുണ്ട്.
നായൻതാര ആദ്യമായി ഹിന്ദി സിനിമയിൽ നായികയാകുന്നു എന്നതും പ്രത്യേകതയാണ്. അറ്റ്ലിയുടെയും ആദ്യ ബോളിവുഡ് ചിത്രവുമാണിത്.
ചിത്രീകരണം ഉടൻ പൂർത്തിയായാലും ജൂൺ 2ന് റിലീസ് സാധ്യമാകുമോ എന്നതിൽ അണിയറപ്രവർത്തകർക്ക് ആശങ്കയുണ്ട്. ആ തീയതി സാധ്യമല്ലെങ്കിൽ ഒക്ടോബറിലേയ്ക്ക് മാറ്റുമെന്നാണ് അടുത്ത വൃത്തങ്ങൾ അറിയിക്കുന്നത്.
എഡിറ്റിംഗിലെ പുരോഗതികൾ വിലയിരുത്തിയ ശേഷം ഫൈനൽ ഡേറ്റിൽ ഷാരൂഖും അറ്റ്ലിയും ധാരണയിലെത്തും. ഏറ്റവും മികച്ച രീതിയിൽ ജവാനെ പ്രേക്ഷകരിൽ എത്തിക്കാൻ ആഗ്രഹിക്കുന്നതിനാൽ എല്ലാ വശവും പരിഗണിച്ചാകും തീരുമാനമെടുക്കുക.