മാരുതി സുസുക്കി ഇന്ത്യയില്‍ നിര്‍മ്മിച്ച ഓഫ് റോഡ് വാഹനമായ മാരുതി സുസുക്കി ജിംനി കടല്‍ കടക്കാനൊരുങ്ങുകയാണ്. ജിംനി മോഡലുകള്‍ കമ്പനി കയറ്റുമതി ചെയ്യാന്‍ ആരംഭിച്ചുവെന്നാണ് റിപ്പോര്‍ട്ടുകള്‍. രാജ്യത്ത് നിന്ന് മറ്റ് രാജ്യങ്ങളിലേക്ക് കയറ്റുമതി ചെയ്യുന്ന പതിനെട്ടാമത്തെ മോഡലാണ് മാരുതി സുസുക്കി ജിംനി.
പല വിപണികളിലും സുസുക്കി ജിംനിയുടെ 3 ഡോര്‍ പതിപ്പ് വില്‍പ്പന നടത്തുന്നുണ്ട് എങ്കിലും 5 ഡോറുകളുള്ള ജിംനി മോഡല്‍ ഇന്ത്യയില്‍ മാത്രമാണ് നിര്‍മ്മിച്ചിരുന്നത്. ലാറ്റിന്‍ അമേരിക്ക, മിഡില്‍ ഈസ്റ്റ്, ആഫ്രിക്ക എന്നിങ്ങനെയുള്ള രാജ്യങ്ങളിലേക്കാണ്
മാരുതി സുസുക്കി ജിംനി 5 ഡോര്‍ എസ്യുവി കയറ്റുമതി ചെയ്യുന്നത്. മാരുതി സുസുക്കി സ്വിഫ്റ്റ്, ഡിസയര്‍, എസ്-പ്രെസ്സോ, ബലേനോ, ബ്രെസ്സ എന്നീ മോഡലുകളും മറ്റ് രാജ്യങ്ങളിലേക്ക് കയറ്റുമതി ചെയ്യുന്നുണ്ട്.
മാരുതി സുസുക്കി ജിംനി 5 ഡോര്‍ 2023 ഡല്‍ഹി ഓട്ടോ എക്സ്പോയില്‍ വച്ചാണ് അവതരിപ്പിച്ചത്. 2023 ജൂണില്‍ ഈ വാഹനം ഔദ്യോഗികമായി ലോഞ്ച് ചെയ്തത്. മാരുതി സുസുക്കി ജിംനി രണ്ട് വേരിയന്റുകളിലാണ് അവതരിപ്പിച്ചിട്ടുള്ളത്. വാഹനത്തിന്റെ സെറ്റ വേരിയന്റിന് 12.74 ലക്ഷം രൂപയാണ് എക്‌സ് ഷോറൂം വില. ജിംനിയുടെ ആല്‍ഫ വേരിയന്റിന്റെ എക്‌സ് ഷോറൂം വില 15.5 ലക്ഷം രൂപയാണ്.
