ജജ്പൂര്: അധ്യാപകന്റെ ശിക്ഷാ നടപടിയെ തുടര്ന്ന് നാലാം ക്ലാസ് വിദ്യാര്ഥി കുഴഞ്ഞുവീണു മരിച്ചു. രുദ്ര നാരായണ് സേതി(10) യാണ് മരിച്ചത്. ഒഡിഷയിലെ ജാജ്പൂര് ജില്ലയിലെ കുഖിയ പൊലീസ് പരിധിയില് ഒറാലിയിലെ സൂര്യനാരായണ നോഡല് അപ്പര് പ്രൈമറി സ്കൂളിലാണ് സംഭവമുണ്ടായത്.
ഉച്ച കഴിഞ്ഞ് മൂന്നു മണിയോടെ രുദ്രയും സഹപാഠികളും ക്ലാസ് സമയത്ത് പുറത്ത് കളിക്കുന്നതായി അധ്യാപകന്റെ ശ്രദ്ധയില് പെട്ടു. വിദ്യാര്ഥികള് ക്ലാസിലെത്തിയപ്പോള് അധ്യാപകന് അവരോട് ചില ചോദ്യങ്ങള് ചോദിച്ചു. രുദ്ര അതിന് ഉത്തരം പറഞ്ഞില്ല. ഇതിനെ തുടര്ന്ന് കുട്ടിയോട് മുട്ടില് നില്ക്കാന് ആവശ്യപ്പെടുകയായിരുന്നു. ശിക്ഷയായി സിറ്റ് അപ് ചെയ്യാനും നിര്ദേശിച്ചു. മൂന്നോ നാലോ സിറ്റ് അപ് കഴിഞ്ഞപ്പോള് രുദ്ര കുഴഞ്ഞുവീഴുകയായിരുന്നുവെന്ന് സഹപാഠി പറഞ്ഞു.
ഉടന് തന്നെ രുദ്രയെ അടുത്തുള്ള ആശുപത്രിയിലും അവിടെ നിന്ന് കമ്മ്യൂണിറ്റി ഹെല്ത്ത് സെന്ററിലും കൊണ്ടുപോയി.പിന്നീട് കട്ടക്കിലെ എസ്സിബി മെഡിക്കല് കോളേജ് ആശുപത്രിയിലേക്കും. അവിടെ എത്തിയപ്പോള് കുട്ടി മരിച്ചതായി ഡോക്ടര്മാര് സ്ഥിരീകരിച്ചു.
സംഭവം നടക്കുമ്പോള് താന് സ്ഥലത്തുണ്ടായിരുന്നില്ലെന്ന് സ്കൂളിലെ പ്രധാന അധ്യാപിക പ്രമീള പാണ്ഡ പറഞ്ഞു. വിവരം അറിഞ്ഞതിനെ തുടര്ന്ന് കുട്ടിയുടെ പിതാവിനെ വിവരമറിയിക്കുകയും അടുത്തുള്ള ആരോഗ്യ കേന്ദ്രത്തിലേക്ക് കൊണ്ടുപോവുകയും ചെയ്തു. രുദ്രയുടെ ആരോഗ്യാവസ്ഥയെക്കുറിച്ച് മാതാപിതാക്കള് സ്കൂളിനെ അറിയിച്ചിരുന്നില്ലെന്നും അവര് കൂട്ടിച്ചേര്ത്തു.