ഒരുവിധം എല്ലാവർക്കും ഇഷ്ടമുള്ള ഒന്നാണ് അരിമുറുക്ക്. നാലുമണി ചായയോടൊപ്പം മുറുക്ക് കൊറിക്കാൻ ഇഷ്ടമില്ലാത്തവർ ആരും തന്നെ ഉണ്ടാകില്ല. വളരെ രുചിയിൽ അരിമുറുക്ക് നമുക്ക് വീട്ടിൽ തന്നെ ഉണ്ടാക്കിയെടുക്കാം. ഇത് എങ്ങനെയാണ് ഉണ്ടാക്കുന്നത് എന്ന് നോക്കാം.
ഇതിനായി ആദ്യം തന്നെ ഒരു പാൻ അടുപ്പത്ത് വച്ച് അതിലേക്ക് കുറച്ച് ഉഴുന്ന് ഇട്ട് നല്ലതുപോലെ വറുത്തെടുക്കണം. ചൂടാറിയതിനു ശേഷം ഇത് ഒന്ന് പൊടിച്ചെടുക്കാം. വറുത്ത അരിപ്പൊടിയാണ് മുറുക്ക് തയ്യാറാക്കാനായി ഉപയോഗിക്കേണ്ടത്. പിന്നീട് അരിപ്പൊടി ഒരു പാത്രത്തിലേക്ക് എടുക്കാം
ഇതിലേക്ക് വറുത്ത് പൊടിച്ച് മാറ്റിവെച്ചിരിക്കുന്ന ഉഴുന്ന്, എരുവിന് ആവശ്യമായ മുളകുപൊടി, പാകത്തിന് ഉപ്പ്, അല്പം കായം പൊടി, എള്ള് എന്നിവ ചേർത്ത് കൊടുത്ത് നല്ലതുപോലെ ഒന്ന് മിക്സ് ചെയ്യാം. ശേഷം ഇതിലേക്ക് കുറേശ്ശെയായി വെള്ളം ഒഴിച്ചു കൊടുക്കണം. നൂൽപുട്ടിനുള്ള മാവിന്റെ പരുവത്തിൽ സോഫ്റ്റ് ആകുന്നതുവരെ കുഴച്ചെടുക്കാം.
അല്പനേരം ഈ മാവ് റസ്റ്റ് ചെയ്യാനായി മാറ്റിവയ്ക്കാം. ഒരു പാത്രത്തിൽ എണ്ണ നല്ലതുപോലെ ചൂടാക്കി എടുക്കാം. ഇനി സേവാനാഴിയിലേക്ക് മാവ് നിറച്ചു കൊടുക്കണം. മുറുക്കിന്റെ അച്ചാണ് സേവാനാഴിയിൽ ഇടേണ്ടത്. എണ്ണ നല്ലതുപോലെ ചൂടാകുമ്പോൾ മുറുക്കിന്റെ പരുവത്തിൽ എണ്ണയിലേക്ക് മാവ് ഇട്ടുകൊടുത്ത നല്ലതുപോലെ വറുത്തെടുക്കണം. രുചികരവും ക്രിസ്പിയുമായ അരിമുറുക്ക് റെഡി.