ടി പി ചന്ദ്രശേഖരൻ വധക്കേസ് പ്രതിയായ പി കെ കുഞ്ഞനന്തന്റെ മരണത്തിൽ ദുരൂഹത ആരോപിച്ച് മുസ്ലിം ലീഗ് നേതാവ് കെഎം ഷാജി. സിപിഎം പ്രതിക്കൂട്ടിലായ പല കേസുകളിലെയും പ്രതികൾ ആത്മഹത്യ ചെയ്യുന്നതിൽ ദുരൂഹതയുണ്ട് എന്നും പി കെ കുഞ്ഞനന്തന് ജയിലിൽ നിന്ന് ഭക്ഷ്യവിഷബാധ ഏൽക്കുന്നതിന് ആഴ്ചകൾക്കു മുൻപ് ഒരു വിവിഐ പി ജയിലിൽ സന്ദർശനം നടത്തി എന്നും വിവിഐപി ആര് എന്ന കാര്യം പിന്നീട് വ്യക്തമാക്കുമെന്നും കെഎം ഷാജി പറഞ്ഞു.
തെരഞ്ഞെടുപ്പ് യോഗത്തിനോടനുബന്ധിച്ച് പേരാമ്പ്രയിൽ ആയിരുന്നു ഷാജി വിമർശനം ഉന്നയിച്ചത്. കൊലപാതക കേസിൽ നേതാക്കളിലേക്ക് എത്താൻ പറ്റുന്ന ഏക കണ്ണിയായ പി കെ കുഞ്ഞനന്തന്റെ മരണത്തിൽ ദുരൂഹതയുണ്ട് എന്നും കൊലപാതക കേസിലെ രഹസ്യം ചോരുമോ എന്ന ഭയത്താൽ കൊന്നവരെ കൊല്ലുന്ന രീതിയാണ് സിപിഎമ്മിന് ഉള്ളത് എന്നും കെഎം ഷാജി ആരോപിക്കുന്നു.നേരത്തെയും സിപിഎമ്മിനെതിരെ ഇത്തരത്തിൽ ആരോപണമുന്നയിച്ച് കെഎം ഷാജി രംഗത്ത് വന്നിരുന്നു. ഷാജിയുടെ ആരോപണം തെറ്റാണെന്ന് വ്യക്തമാക്കി കുഞ്ഞനന്തന്റെ മകൾ പി കെ ഷബ്‌ന രംഗത്ത് വരികയും ചെയ്തിരുന്നു.
