ഡൗൺലോഡ് വേഗത കുത്തനെ കൂട്ടി ജിയോ; കാരണം ഇതാണ്

4 ജി നെറ്റ് വർക്ക് സ്പീഡ് കൂട്ടി റിലയൻസ് ജിയോ. ഓക്‌ലയുടെ റിപ്പോർട്ടിൽ ആണ് ഈ കാര്യം വ്യക്തമാക്കിയത്. ഓക്‌ലയുടെ ജൂണിലെ റിപ്പോർട്ട് പ്രകാരം റിലയൻസ് ജിയോ മീഡിയൻ ഡൗൺലോഡ് സ്പീഡ് 13.08 എംബി പിഎസാണ്. 2021 മാർച്ചിൽ ഇത് 5.96 എംബിപിഎസ് ആയിരുന്നു. അതേസമയം, ട്രായിയുടെ കണക്കുകളിൽ ജിയോയുടെ ഡൗൺലോഡ് വേഗം 18 എംബിപിഎസിന് മുകളിലാണ് കാണിക്കുന്നത്.
നാലു മാസത്തിനുള്ളിൽ പത്തിരട്ടിയാണ് ജിയോയുടെ ഡൌണ്‍ലോഡ് വേഗത കൂടിയത്. ഇതിന് കാരണമായത് ജിയോ അധിക സ്പെക്ട്രം വിന്യസിച്ചതാണെന്ന് റിപ്പോർട്ടിൽ പറയുന്നുണ്ട്. 5ജി വരുന്നതോടെ ഇന്ത്യയിലെ ശരാശരി ഡൗൺലോഡ് വേഗം പത്ത് മടങ്ങ് വർധിക്കുമെന്ന് ഓക്‌ലയുടെ റിപ്പോർട്ടിൽ പറയുന്നു. 4ജിയുമായി താരതമ്യം ചെയ്യുമ്പോൾ 5ജി ഡൗൺലോഡ് വേഗം 9 മുതൽ 10 മടങ്ങ് വരെ വർധിച്ച മറ്റ് ഏഷ്യൻ രാജ്യങ്ങളിൽ നിന്നുള്ള ഡേറ്റ പ്രകാരമാണ് ഓക്‌ലയുടെ റിപ്പോര്‍ട്ടിലെ അനുമാനം.

നിലവിലെ 4ജി വേഗത പരിഗണിക്കുമ്പോള്‍ ജിയോയുടെ 5ജി വേഗം 130 എംബിപിഎസ് ആയേക്കുമെന്ന് റിപ്പോര്‍ട്ട് പറയുന്നു.
ഭാരതി എയർടെൽ, റിലയൻസ് ജിയോ എന്നിവ പുതുതായി വാങ്ങിയ സ്പെക്ട്രം ഉപയോഗിക്കുക വഴി ടെലികോം ഉപഭോക്താക്കൾക്ക് മികച്ച നെറ്റ്‌വർക്ക് അനുഭവം നൽകുന്നുണ്ട്. അതേസമയം, ഇന്ത്യയിൽ 5ജി തുടങ്ങാൻ വൈകുന്നത് നെറ്റ്‌വർക്ക് ഉപകരണങ്ങളും 5ജി സാങ്കേതികവിദ്യയും കുറഞ്ഞ ചെലവിൽ ലഭ്യമാക്കാൻ സഹായിക്കുമെന്നാണ് ഓക്‌ല കരുതുന്നത്. ഇന്ത്യയിൽ 5 ജി നെറ്റ് വർക്ക് വരുന്നതോടുകൂടി ഉപയോക്താക്കളുടെ എണ്ണത്തിലും വർദ്ധനവ് ഉണ്ടായിരിക്കും.