ഗൗരവതരമായ ചര്‍ച്ചകള്‍ നടക്കാറുള്ളയിടമാണ് ട്വിറ്റര്‍. പലപ്പോളും ആ ചര്‍ച്ചകള്‍ക്കുള്ള പരിമിതിയായി മാറുന്നത് ട്വിറ്ററില്‍ വാക്കുകള്‍ ടൈപ്പ് ചെയ്യുന്നതിനുള്ള പരിമിതിയാണ്. 280 അക്ഷരങ്ങളാണ് നിലവില്‍ ട്വിറ്ററില്‍ ടൈപ്പ് ചെയ്യാനാവുക. എന്നാല്‍ ഇപ്പോള്‍ ഈ നിയന്ത്രണമില്ലാതെ മുഴുനീള ലേഖനങ്ങള്‍ പങ്കുവെക്കാനുള്ള സൗകര്യം ഒരുക്കാനുള്ള ശ്രമത്തിലാണത്രെ ട്വിറ്റര്‍.
ട്വിറ്ററിലെ പുതിയ അപ്‌ഡേറ്റുകളെ കുറിച്ചുള്ള വിവരങ്ങള്‍ പങ്കുവെക്കാറുള്ള ജെയ്ന്‍ മാഞ്ചുന്‍ വോങ് ആണ് മുഴുനീള ലേഖനങ്ങള്‍ എഴുതാനുള്ള സൗകര്യമൊരുക്കാന്‍ ട്വിറ്ററിന് പദ്ധതിയുണ്ടെന്ന വിവരം പുറത്തുവിട്ടത്. ‘ട്വിറ്റര്‍ ആര്‍ട്ടിക്കിള്‍സ്’ (Twitter Articles) എന്നാണ് ഇതിന് പേര്.
ഇതുമായി ബന്ധപ്പെട്ട് ഒരു സ്‌ക്രീന്‍ഷോട്ടും അദ്ദേഹം പങ്കുവെച്ചിട്ടുണ്ട്. ഇത്തരം ലേഖനങ്ങള്‍ക്കായി പ്രത്യേക ടാബും ട്വിറ്ററിന്റെ പ്രധാന വിന്‍ഡോയില്‍ ഉണ്ടാവും. എക്‌സ്‌പ്ലോര്‍, സ്‌പേസസ് എന്നിവയ്‌ക്കൊപ്പമായിരിക്കും ഇത്.
ആര്‍ട്ടിക്കിള്‍ ഫീച്ചറിനെ കുറിച്ചുള്ള വിവരം ആദ്യമായാണ് പുറത്തുവരുന്നത്. ഇത് സംബന്ധിച്ച് ഔദ്യോഗിക സ്ഥിരീകരണമൊന്നും തന്നെയില്ല. ട്വിറ്റര്‍ ഇതുമായി ബന്ധപ്പെട്ട് ഒന്നും പറഞ്ഞിട്ടില്ല.
Twitter is working on “Twitter Articles” and the ability to create one within Twitter
— Jane Manchun Wong (@wongmjane) February 2, 2022
Possibility a new longform format on Twitter pic.twitter.com/Srk3E6R5sz
നിലവില്‍ 280 അക്ഷരങ്ങളുടെ പരിമിതിയുള്ളതിനാല്‍ ട്വീറ്റുകള്‍ക്ക് കീഴില്‍ ട്വീറ്റുകളായി വിവരങ്ങള്‍ ടൈപ്പ് ചെയ്യുകയാണ് ചെയ്തുവരുന്നത്. ഇതിനെ ത്രെഡ് (Thread) എന്നാണ് വിളിക്കുന്നത്.
മൈക്രോ ബ്ലോഗിങ് പ്ലാറ്റ്‌ഫോം എന്ന പേരില്‍ ട്വിറ്റര്‍ അറിയപ്പെടുന്നത് തന്നെ വളരെ ചരുക്കം വാക്കുകളില്‍ എഴുത്തുകള്‍ പങ്കുവെക്കുന്നതിനാലാണ്. നേരത്തെ 140 അക്ഷരങ്ങളായിരുന്നു അനുവദിച്ചിരുന്നത്. ദൈര്‍ഘ്യ മേറിയ കുറിപ്പുകള്‍ പങ്കുവെക്കാന്‍ അവ ടൈപ്പ് ചെയ്ത ഇമേജുകളുണ്ടാക്കി അപ് ലോഡ് ചെയ്യുകയാണ് ചിലര്‍ ചെയ്യാറുള്ളത്.
ഇത് കൂടാതെ ട്വീറ്റുകള്‍ തിരഞ്ഞെടുത്ത ഫോളോവര്‍മാരെ മാത്രം കാണിക്കുന്നതിനായുള്ള ‘ട്വിറ്റര്‍ ഫ്‌ളോക്ക്’ (Twitter Flock) ഫീച്ചറും അണിയറയില്‍ ഒരുങ്ങുന്നുണ്ടെന്നാണ് വിവരം. ഇന്‍സ്റ്റാഗ്രാമിലെ ക്ലോസ് ഫ്രണ്ട്‌സ് (Close Friends) ഫീച്ചറിന് സമാനമാണിത്. ഒപ്പം ട്വീറ്റുകള്‍ തിരഞ്ഞ് കണ്ടുപിടിക്കുന്നതിനുള്ള പുതിയ സെര്‍ച്ച് ബാറും, ട്വീറ്റുകള്‍ ഉദ്ധരിച്ച് (Tweet Quote) ട്വീറ്റ് ചെയ്യാനുള്ള സൗകര്യവും പരീക്ഷിക്കുന്നുണ്ട്.
You must be logged in to post a comment Login