തിരുവനന്തപുരം: പശുക്കളോടുള്ള സ്നേഹവും വാത്സല്യവും പങ്കുവച്ച് നടനും ബി.ജെ.പി പ്രവർത്തകനുമായ കൃഷ്ണകുമാർ. തന്‍റെ പേരിൽ കൃഷ്ണനുണ്ടെന്നും അതിനാൽ പശുക്കളോടുള്ള തന്‍റെ സ്നേഹം ഇന്നോ ഇന്നലെയോ തുടങ്ങിയതല്ലെന്നും അദ്ദേഹം പറഞ്ഞു. ഫേസ്ബുക്കിൽ പശുക്കളോടൊത്തുള്ള ചിത്രങ്ങൾക്കൊപ്പം പങ്കുവച്ച കുറിപ്പിലാണ് അദ്ദേഹം ഇക്കാര്യം കുറിച്ചത്.
ഇന്നീ വൈകുന്നേരം നിങ്ങളോട് സൗമ്യത, ശാന്തത, സ്നേഹം എന്നിവയെക്കുറിച്ച് ചുരുക്കത്തിൽ ചില കാര്യങ്ങൾ പറയാമെന്നു കരുതിയെന്നും കാരണമെന്താണെന്ന് ഇതിനൊപ്പമുള്ള ചിത്രങ്ങൾ പറയും എന്നാണ് അദ്ദേഹത്തിൻ്റെ കുറിപ്പിൻ്റെ തുടക്കം. സൗകര്യമുള്ളപ്പോഴെല്ലാം പോയി പശുക്കളുടെ അടുത്ത് നിൽക്കുക. അവരുടെ കണ്ണുകളിലേക്ക് നോക്കുക. രാഷ്ട്രീയ അന്ധത ബാധിച്ചില്ലെങ്കിൽ, ആ നിമിഷങ്ങളിൽ മനസ്സ് നിറയുന്നത് നിങ്ങൾക്കും അനുഭവിക്കാൻ കഴിയുമെന്നും അദ്ദേഹം കുറിച്ചു.
നാം ജനിച്ചതും അതിജീവിച്ചതും വളർന്നതും അമ്മയുടെ മുലപ്പാൽ കുടിച്ചുകൊണ്ടാണ്. ഒരു ഘട്ടത്തിനുശേഷം, ഈ നിശബ്ദ പ്രാണികളാണ് നമ്മുടെ ജീവിതത്തിൽ പാലിന്‍റെ ഗുണങ്ങളും മേന്മയും പകർന്നു നൽകുന്നത്. ഇരുവരും അമ്മമാരാണ്. ഗോമാതാവിനെ ആരാധിക്കാനും പരിപാലിക്കാനും പഠിപ്പിച്ച മാതാപിതാക്കൾക്ക് നന്ദിയെന്നും അദ്ദേഹം കുറിച്ചു.
