ജപ്പാന്‍ മൊബിലിറ്റി ഷോയില്‍ ഹോണ്ടയുടെ ഇലക്ട്രിക് സ്‌കൂട്ടര്‍ അവതരിപ്പിച്ചു. ആക്ടീവ സ്‌കൂട്ടറിന്റെ ഇലക്ട്രിക് മോഡലാണ് അവതരിപ്പിച്ചത്. എസ് സി ഇ എന്നാണ് പേരിട്ടിരിക്കുന്നത്. എടുത്തു മാറ്റാവുന്ന ബാറ്ററിയുമായാണ് പുതിയ വാഹനം എത്തുന്നത്. എസ്‌സിഇയില്‍ 1.3 kWh ന്റെ രണ്ട് ബാറ്ററികളുണ്ടാകും.
ഒഴുകിയിറങ്ങുന്ന രൂപകല്‍പനയാണ് ഈ വൈദ്യുത സ്‌കൂട്ടറിലുള്ളത് ഡിസൈന്‍ വളരെ ലളിതവും എന്നാല്‍ സ്‌റ്റൈലിഷും ആണ്. ഹാന്‍ഡിലിനു മുന്നില്‍ എല്‍ഇഡി ലൈറ്റും നല്‍കിയിട്ടുണ്ട്. മുന്നിലേയും പിന്നിലേയും ഇന്‍ഡിക്കേറ്ററുകളിലും മോട്ടോര്‍ കവറിലും വൈദ്യുത സ്‌കൂട്ടറെന്ന സൂചനയില്‍ നീല വര നല്‍കിയിരിക്കുന്നു. സിംഗിള്‍ സീറ്റ്, ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, വാഹനത്തോടു ചേര്‍ന്നിരിക്കുന്ന ഫൂട്ട് പെഗ് എന്നിവയുമുണ്ട്
സീറ്റിനുള്ളിലാണ് ഹോണ്ട മൊബൈല്‍ പവര്‍ പാക്ക് ഇ ബാറ്ററികള്‍ വെച്ചിരിക്കുന്നത്. ഓരോന്നിനും 10 കിലോഗ്രാം വീതമാണ് ഭാരം. സീറ്റിന് അടിയിലെ സ്റ്റോറേജ് സ്പേസ് ബാറ്ററികള്‍ ഇല്ലാതാക്കുന്നുണ്ട്. ഏതാണ്ട് 100 കിലോമീറ്ററോട് അടുപ്പിച്ചായിരിക്കും റേഞ്ച്. ഉയര്‍ന്ന വേഗത മണിക്കൂറില്‍ 60-70 കിലോമീറ്റര്‍ പ്രതീക്ഷിക്കാം. ഏകദേശം ഏഴ് ഇഞ്ച് സ്‌ക്രീനും ഇതിനുണ്ട്. അതേസമയം ഇത് എല്‍ഇഡി ആണോ അതോ ടി.എഫ്.ടി ആണോ എന്ന് വ്യക്തതയില്ല. ഈ സ്‌ക്രീന്‍ ഒരു ടാബ്ലെറ്റ് പോലെ ഉയര്‍ത്തിയിരിക്കുന്നു. ഇലക്ട്രിക് സ്‌കൂട്ടറുമായി ബന്ധപ്പെട്ട എല്ലാ വിശദാംശങ്ങളും ഇതില്‍ ദൃശ്യമാകുമെന്ന് പ്രതീക്ഷിക്കുന്നു.
അതേസമയം, ഇന്ത്യന്‍ വിപണിയിലേക്ക് എപ്പോഴാണ് ഹോണ്ടയുടെ ഈ വൈദ്യുത സ്‌കൂട്ടര്‍ എത്തുകയെന്ന് പറയാനാവില്ല. എങ്കിലും അടുത്തവര്‍ഷം വൈദ്യുത സ്‌കൂട്ടറുകള്‍ ഹോണ്ട ഇന്ത്യയിലെത്തിക്കുമെന്നാണ് പ്രതീക്ഷിക്കുന്നത്.
