പ്രവാസികളായ മലയാളികൾ അടക്കമുള്ളവർക്ക് ആശ്വാസം പകർന്ന സലാം ഇന്ത്യൻ സെക്ടറിലേക്ക് സർവീസ് പുനരാരംഭിക്കാൻ ഒരുങ്ങുന്നു. ഡിസംബർ അഞ്ചു മുതലാണ് മസ്കറ്റിൽ നിന്നും നേരിട്ട് തിരുവനന്തപുരം, കോഴിക്കോട്, ഹൈദരാബാദ്, ജയ്പൂർ, ലക്നൗ എന്നീ 5 ഇന്ത്യൻ നഗരങ്ങളിലേക്ക് സലാം എയർ സർവീസ് നടത്തുക.
കഴിഞ്ഞ ഒക്ടോബർ ഒന്നുമുതൽ ഇന്ത്യയിലേക്ക് വിമാനങ്ങൾ അനുവദിക്കുന്നതിനുള്ള പരിമിതി മൂലം ഈ റൂട്ടുകളിൽ നിന്ന് ഒമാൻ ബജറ്റ് എയർ വിമാനമായ സലാം എയർ പൂർണ്ണമായും പിൻവാങ്ങിയിരുന്നു.
ടിക്കറ്റ് ബുക്ക് ചെയ്യുന്നതടക്കം ഉള്ള നടപടികൾ വരും ദിവസങ്ങളിൽ തന്നെ തുടങ്ങുമെന്നും ഇന്ത്യൻ സെക്ടറിലേക്ക് സർവീസുകൾ പുനരാരംഭിക്കാൻ സഹായിച്ചത് ഒമാനിലെ സിവിൽ ഏവിയേഷൻ അതോറിറ്റിയുടെ( സി എ എ ) പിന്തുണയും ഒമാൻ എയറുമായുള്ള സഹകരണവും ആണെന്ന് സലാം എയർ പുറത്തിറക്കിയ പ്രസ്താവനയിൽ അറിയിച്ചു.
