മുംബൈ: പ്രശസ്ത ബോളിവുഡ് നടനും ഗായകനുമായ മെഹമൂദ് ജൂനിയര് (67) അന്തരിച്ചു. അര്ബുദബാധിതനായി ചികിത്സയിലായിരുന്നു അദ്ദഹം. ഒരു മാസം മുമ്പാണ് സംവിധായകന് കൂടിയായ താരത്തിന് അര്ബുദമാണെന്ന് കണ്ടെത്തിയത്. പക്ഷേ അപ്പോഴേക്കും രോഗം ശ്വാസകോശത്തേയും മറ്റ് ആന്തരികാവയവങ്ങളേയും ബാധിച്ചിരുന്നു.
മെഹമൂദ് ജൂനിയറിന്റെ മരണവാര്ത്ത അടുത്ത സുഹൃത്തായ സലാം കാസി സ്ഥിരീകരിച്ചു. ഏഴു ഭാഷകളിലായി 250-ലേറെ ചിത്രങ്ങളില് അദ്ദേഹം അഭിനയിച്ചിട്ടുണ്ട് മെഹമൂദ് ജൂനിയര്. ആറ് മറാഠി ചിത്രങ്ങള് നിര്മിക്കുകയും സംവിധാനം ചെയ്യുകയും ചെയ്തു. നയീം സയ്യിദ് എന്നാണ് യഥാര്ത്ഥ പേര്. 1967-ല് പുറത്തിറങ്ങിയ നൗനിഹാലില് ബാലതാരമായാണ് സിനിമാജീവിതം തുടങ്ങിയത്.
കാരവന്, ജുദായി, ദാദാഗിരി, ഹാഥി മേരേ സാഥി, മേരാ നാം ജോക്കര് തുടങ്ങിയവയാണ് ശ്രദ്ധേയമായ ചില ചിത്രങ്ങള്.പ്യാര് കാ ദര്ദ് ഹേ മീഠാ മീഠാ പ്യാരാ പ്യാരാ, ഏക് റിഷ്താ സഝേധാരി കാ, തെനാലി രാമ എന്നീ ടെലിവിഷന് പരമ്പരകളിലും അഭിനയിച്ചിട്ടുണ്ട്.