ആരാധകർ ആകാംക്ഷയോടെ കാത്തിരിക്കുന്ന ‘സലാര് പാര്ട്ട് -1 സീസ്ഫയര്’ സിനിമയുടെ സെൻസറിങ് നടപടികൾ പൂർത്തിയാക്കി. ചിത്രത്തിന് എ സർട്ടഫിക്കേറ്റാണ് സെൻസർ ബോർഡ് നൽകിയിരിക്കുന്നത്. ചിത്രം ഡിസംബർ 22ന് തിയറ്ററുകളിൽ എത്തും.
സിനിമയിലെ അമിതമായി ഉൾപ്പെടുത്തിയിരിക്കുന്ന വയലൻസ് രംഗങ്ങളുടെ അടിസ്ഥാനത്തിലാണ് സെൻസർ ബോർഡ് സലാറിന് എ സർട്ടിഫിക്കേറ്റ് നൽകിയിരിക്കുന്നത്.
കെജിഎഫ് സിനിമകളുടെ സംവിധായകനായ പ്രശാന്ത് നീൽ ഒരുക്കുന്ന ചിത്രത്തിൽ തെലുങ്ക് താരം പ്രഭാസാണ് നായകൻ. ചിത്രത്തിൽ മലയാളി താരം പൃഥ്വിരാജാണ് മറ്റൊരു പ്രധാന വേഷത്തെ അവതരിപ്പിക്കുന്നത്. ശ്രുതി ഹാസൻ ആണ് ചിത്രത്തിൽ നായിക.
കെജിഎഫ് സിനിമകളുടെ നിർമാതാക്കളായ ഹൊംബാലെ ഫിലിംസാണ് സലാർ നിർമിച്ചിരിക്കുന്നത്. ഹൊംബാലെ ഫിലിംസിന്റെ ബാനറിൽ വിജയ് കിരഗണ്ടൂരാണ് ചിത്രത്തിന്റെ നിർമാതാവ്.
ചിത്രത്തിൽ കെജിഎഫ് താരം യഷ് കാമിയോ വേഷത്തിലെത്തുമെന്ന് റിപ്പോർട്ടുകളുണ്ട്. ജഗപതി ബാബു, ഈശ്വരി റാവു എന്നിവരാണ് മറ്റ് താരങ്ങൾ.
ഭുവൻ ഗൗഡ ഛായാഗ്രഹണവും രവി ബസ്രുർ സംഗീത സംവിധാനവും നിർവഹിക്കുന്നു. ചിത്രത്തിന്റെ മലയാളം ഉൾപ്പെടെയുള്ള അഞ്ച് ഭാഷകളിലും തന്റെ കഥാപാത്രത്തിന് പൃഥ്വിരാജ് തന്നെയാണ് ഡബ് ചെയ്തിരിക്കുന്നത്.