ന്യൂഡല്ഹി: പേടിഎം ഫാസ്ടാഗ് ഉപയോക്താക്കള്ക്ക് നിര്ദേശവുമായി നാഷണല് ഹൈവേ അതോറിറ്റി. മാര്ച്ച് 15നകം പേടിഎം ഫാസ്ടാഗ് ഉപേക്ഷിച്ച് മറ്റൊരു ബാങ്കില് നിന്ന് പുതിയ ഫാസ്ടാഗ് സേവനം തേടാനാണ് നിര്ദേശത്തില് പറയുന്നത്.
ദേശീയപാതയില് ടോള് പ്ലാസ കടന്നുള്ള യാത്രയില് പെനാല്റ്റി ഒടുക്കുന്നതും ഇരട്ട ഫീസ് നല്കുന്നതും ഒഴിവാക്കാന് എത്രയും പെട്ടെന്ന് മറ്റൊരു ബാങ്കിന്റെ ഫാസ്ടാഗിലേക്ക് മാറാനാണ് ദേശീയപാത അതോറിറ്റിയുടെ വാര്ത്താക്കുറിപ്പില് പറയുന്നത്.
സാമ്പത്തിക ക്രമക്കേടുകൾ ചൂണ്ടിക്കാട്ടി ചില പ്രവർത്തനങ്ങളിൽ നിന്ന് പേടിഎം പേയ്മെൻ്റ് ബാങ്ക് ലിമിറ്റഡിനെ റിസർവ് ബാങ്ക് ഓഫ് ഇന്ത്യ (ആർബിഐ) വിലക്കിയതിന് പിന്നാലെയാണ് എൻഎച്ച്എഐയുടെ നടപടി.
മാര്ച്ച് 15ന് ശേഷം ഡെപ്പോസിറ്റുകള് സ്വീകരിക്കുന്നത് അടക്കമുള്ള നടപടികളില് നിന്നാണ് പേടിഎം പേയ്മെന്റ്സ് ബാങ്കിനെ റിസര്വ് ബാങ്ക് വിലക്കിയത്. എന്നാല് മാര്ച്ച് 15ന് ശേഷവും ഫാസ്ടാഗില് ബാലന്സ് ഉള്ളവര്ക്ക് ടോള് അടയ്ക്കുന്നതിന് തടസ്സമില്ല. അല്ലെങ്കിൽ റീഫണ്ട് ആവശ്യപ്പെടാം.
വാഹന ഉടമകൾക്ക് ഫാസ്ടാഗ് നൽകാൻ കഴിയുന്ന 39 ബാങ്കുകളും എൻബിഎഫ്സികളും നാഷണൽ ഹൈവേ അതോറിറ്റി ഓഫ് ഇന്ത്യയുടെ പട്ടികയിൽ ഉൾപ്പെടുന്നു. എയർടെൽ പേയ്മെൻ്റ് ബാങ്ക്, ആക്സിസ് ബാങ്ക് ലിമിറ്റഡ്, ബന്ധൻ ബാങ്ക്, ബാങ്ക് ഓഫ് ബറോഡ, കാനറ ബാങ്ക്, എച്ച്ഡിഎഫ്സി ബാങ്ക്, ഐസിഐസിഐ ബാങ്ക്, ഐഡിഎഫ്സി ഫസ്റ്റ് ബാങ്ക്, ഇൻഡസ്ഇൻഡ് ബാങ്ക്, കൊട്ടക് മഹീന്ദ്ര ബാങ്ക്, പഞ്ചാബ് നാഷണൽ ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, യെസ് ബാങ്ക് എന്നിവയാണ് പട്ടികയിൽ ഉൾപ്പെട്ടിരിക്കുന്നത്.
അലഹബാദ് ബാങ്ക്, എയു സ്മോൾ ഫിനാൻസ് ബാങ്ക്, ബാങ്ക് ഓഫ് മഹാരാഷ്ട്ര, സെൻട്രൽ ബാങ്ക് ഓഫ് ഇന്ത്യ, സിറ്റി യൂണിയൻ ബാങ്ക് ലിമിറ്റഡ്, കോസ്മോസ് ബാങ്ക്, ഡോംബിവ്ലി നഗരി സഹകാരി ബാങ്ക്, ഇക്വിറ്റാസ് സ്മോൾ ഫിനാൻസ് ബാങ്ക്, ഫെഡറൽ ബാങ്ക്, ഫിനോ പേയ്മെൻ്റ് ബാങ്ക്, ഇന്ത്യൻ ബാങ്ക്, ഇന്ത്യൻ ഓവർസീസ് ബാങ്ക്, ജെ ആൻഡ് കെ ബാങ്ക്, കർണാടക ബാങ്ക്, കരൂർ വൈശ്യ ബാങ്ക്, ലിവ്ക്വിക്ക് ടെക്നോളജി പ്രൈവറ്റ് ലിമിറ്റഡ്, നാഗ്പൂർ നാഗരിക് സഹകാരി ബാങ്ക് ലിമിറ്റഡ്, പഞ്ചാബ് മഹാരാഷ്ട്ര ബാങ്ക്, സരസ്വത് ബാങ്ക്, സൗത്ത് ഇന്ത്യൻ ബാങ്ക്, സിൻഡിക്കേറ്റ് ബാങ്ക്, ദി ജൽഗാവ് പീപ്പിൾസ് കോ-ഓപ്പ് ബാങ്ക്, തൃശൂർ ജില്ലാ സഹകരണ ബാങ്ക്, യൂക്കോ ബാങ്ക് എന്നിവയും പട്ടികയിൽ ഉൾപ്പെട്ടിരിക്കുന്നു.