മേമല സ്വദേശിനിയായ പതിനെട്ടുകാരിയുടെ ആത്മഹത്യ; യുവാവ് അറസ്റ്റിൽ

വിതുര: മേമല സ്വദേശിനിയായ പതിനെട്ടുകാരി ആത്മഹത്യ ചെയ്ത സംഭവത്തിൽ പ്രേരണ കുറ്റത്തിനു മേമല വലിയവേങ്കാട് അരുൺ സദനത്തിൽ കിരൺ കുമാർ(26) അറസ്റ്റിലായി കഴിഞ്ഞ മാസം 30 ന് അച്ഛനും അമ്മയും ജോലിക്കു പോയ സമയത്താണു പെൺകുട്ടി വീടിനുള്ളിൽ തൂങ്ങി മരിച്ചത്. കിരണുമായി രണ്ട് വർഷത്തോളമായി പെൺകുട്ടി അടുപ്പത്തിലായിരുന്നു. രണ്ട് വർഷത്തിനു ശേഷം വിവാഹം നടത്താമെന്നു വീട്ടുകാർ ധാരണയിലെത്തിയിരുന്നു. എന്നാൽ യുവാവ് വിവാഹത്തിൽ നിന്നു പിന്മാറുമെന്നു ബോധ്യം വന്നതോടെ വിവരം അറിയിച്ച ശേഷം പെൺകുട്ടി ആത്മഹത്യ ചെയ്യുകയായിരുന്നു.യുവാവുമായുള്ള ഫോൺ സംഭാഷണത്തിന്റെ തുടർച്ചയായായിരുന്നു ആത്മഹത്യ. താൻ വന്നപ്പോൾ തൂങ്ങി മരിച്ച നിലയിൽ പെൺകുട്ടിയെ കാണുകയായിരുന്നു എന്ന് കിരൺ ബന്ധുക്കളെ അറിയിച്ചു. യുവാവിന്റെ ഫോൺ പരിശോധിച്ചപ്പോൾ കോൾ വിവരങ്ങളും സന്ദേശങ്ങളും ഡിലീറ്റ് ചെയ്തതായി കണ്ടെത്തിയതോടെ സംശയം തോന്നിയ പൊലീസ് പെൺകുട്ടിയുടെ ഫോൺ പരിശോധിച്ചു. തുടർന്നാണു പ്രതിക്കെതിരെ തെളിവുകൾ ലഭിച്ചത്