മുംബൈ: രാജ്യത്തെ ടെലികോം കമ്പനികള്‍ക്ക് അന്തിമ മുന്നറിയിപ്പുമായി ടെലികോം വകുപ്പ്. നാഷണല്‍ സൈബര്‍ സെക്യൂരിറ്റി കോഓര്‍ഡിനേറ്ററുമായി ചേര്‍ന്ന് പ്രവര്‍ത്തിക്കുന്നതിന് വേണ്ടി ടെലികോം കമ്പനികള്‍ ജൂണ്‍ 15 ന് മുമ്പ് ഒരു നോഡല്‍ ഓഫീസറെ നിയമിക്കണമെന്ന് ടെലികോം വകുപ്പ്.
പറഞ്ഞ തീയ്യതിയ്ക്ക് മുമ്പ് നിര്‍ദേശം നടപ്പായില്ലെങ്കില്‍ കമ്പനികള്‍ നടപടി നേരിടേണ്ടിവരുമെന്നും മന്ത്രാലയം വ്യക്തമാക്കി. ചില ടെലികോം കമ്പനികള്‍ കഴിഞ്ഞ വര്‍ഷം ആരംഭിച്ച ട്രസ്റ്റഡ് ടെലികോം പോര്‍ട്ടലില്‍ ഇതുവരെയും രജിസ്റ്റര്‍ ചെയ്തിട്ടില്ലെന്നും മന്ത്രാലയം പറയുന്നു.
ഒരുവര്‍ഷം മുമ്പാണ് രാജ്യത്തെ ടെലികോം കമ്പനികളെല്ലാം ഒരു നോഡല്‍ ഓഫീസറെ നിയമിക്കണമെന്ന് സര്‍ക്കാര്‍ ആവശ്യപ്പെട്ടത്. ഈ നോഡല്‍ ഓഫീസര്‍ക്കാണ് നാഷണല്‍ സൈബര്‍ സെക്യൂരിറ്റി കോര്‍ഡിനേറ്ററുമായി പരസ്പരം സംവദിക്കുന്നതിനും നിര്‍ദേശങ്ങള്‍ നല്‍കുന്നതിനുമുള്ള പ്ലാറ്റ്‌ഫോമായ ട്രസ്റ്റഡ് ടെലികോം പോര്‍ട്ടലിലേക്ക്പ്രവേശനം ലഭിക്കുക. കമ്പനിയുടെ നെറ്റ് വര്‍ക്ക് പ്ലാനുകളെ കുറിച്ച് എന്‍സിഎസ് സിയെ അറിയിക്കേണ്ട ചുമതല നോഡല്‍ ഓഫീസര്‍ക്കാണ്.
എന്‍സിഎസ്.സിയും കമ്പനിയും തമ്മിലുള്ള ഇടപാടുകള്‍ ഈ നോഡല്‍ ഓഫീസര്‍ മുഖേനയാണ് നടക്കേണ്ടത്.
കമ്പനികള്‍ ഉപയോഗിക്കുന്ന നെറ്റ് വര്‍ക്ക് ഉപകരണങ്ങള്‍ക്ക് വേണ്ട അനുമതികള്‍ നല്‍കുക എന്‍.സി.എസ്.സി ആയിരിക്കും. അനുമതിയുള്ള കമ്പനികളില്‍ നിന്ന് മാത്രമേ നെറ്റ് വര്‍ക്ക് വിന്യാസത്തിനുള്ള ഉപകരണങ്ങള്‍ വാങ്ങാന്‍ പാടുള്ളൂ.
You must be logged in to post a comment Login