വെഞ്ഞാറമൂട്: വാമനപുരം മണ്ഡലത്തിലെ ജനങ്ങളുടെ യാത്രാദുരിതത്തിന് പരിഹാരമാകുന്നു.വാമനപുരം ആറിന് കുറുകെ മൂന്ന് പാലങ്ങൾ നിർമ്മിക്കാൻ പൊതുമരാമത്ത് വകുപ്പിന്റെ പദ്ധതിയായി. പുതിയ പാലം നിർമ്മിക്കുന്നതിനു വേണ്ടിയുള്ള വിശദമായ പ്രോജക്ട് എസ്റ്റിമേറ്റ്,മണ്ണ് പരിശോധന എന്നിവയ്ക്കുള്ള അനുമതി ലഭിച്ചു.പ്രദേശവാസികളുടെ നീണ്ട കാത്തിരിപ്പിന് വിരാമമിട്ടാണ് മണ്ഡലത്തിലെ വിവിധ ഭാഗങ്ങളിൽ പാലങ്ങൾ വരുന്നത് . ഇനി കടത്തുവള്ളത്തിന് കാത്ത് നിൽക്കുകയോ നീണ്ടദൂരം കാൽനടയായി സഞ്ചരിക്കുകയോ വേണ്ട. വാമനപുരം മണ്ഡലത്തിലുൾപ്പെട്ട നീർമൺകടവ്,വെള്ളയംദേശം,ജവഹർ കോളനി എന്നിവിടങ്ങളിലാണ് മൂന്ന് പാലങ്ങൾ നിർമ്മിക്കുന്നത്. നീറമൺകടവ് പാലത്തിന് 5 ലക്ഷം രൂപയും വെള്ളം ദേശം ജവഹർ കോളനി പാലം എന്നിവയ്ക്ക് 2.5 ലക്ഷം വീതവുമാണ് ഡി.പി.ആർ തയ്യാറാക്കാൻ അനുമതി ലഭിച്ചിട്ടുള്ളത്. ഇതനുസരിച്ച് സൈറ്റ് സർവേ, പ്രോജക്ട് റിപ്പോർട്ട് തുടങ്ങിയവ തയ്യാറാക്കി സമർപ്പിക്കുന്നതിനായി പൊതുമരാമത്ത് പാലങ്ങൾ വിഭാഗം അസിസ്റ്റന്റ് എക്സിക്യൂട്ടീവ് എൻജിനിയർ,അസിസ്റ്റന്റ് എൻജിനിയർ,ഓവർസീയർ തുടങ്ങിയവർ പ്രസ്തുത സ്ഥലങ്ങൾ സന്ദർശിച്ച് പരിശോധന നടത്തി.
