പോത്തൻകോട്: യുവാവിനെ വീടുകയറി ആക്രമിച്ച സംഭവത്തിൽ രണ്ട് പ്രതികൾ കൂടി പൊലീസിന്റെ പിടിയിലായി. ആലപ്പുഴ പട്ടണക്കാട്, അണ്ടകാരനാഴി സ്രബിക്കൽ വീട്ടിൽ നെഫിൻ (29), ഇടുക്കി ഉടുമ്പൻചോല കമ്പംമേട് പുളിക്കൽ പീടികയിൽ റോഷൻ (25) എന്നിവരാണ് പോത്തൻകോട് പൊലീസിന്റെ പിടിയിലായത്. ആക്രമണത്തിന് പിന്നിൽ കൊല്ലം സ്വദേശി അൻവറിന്റെ ക്വട്ടേഷനാണെന്ന് പ്രതികൾ മൊഴി നൽകി. ആക്രമണത്തിൽ ഉൾപ്പെട്ട രണ്ടുപേരെ നേരത്തെ പൊലീസ് അറസ്റ്റുചെയ്തിരുന്നു. കഴിഞ്ഞ ബുധനാഴ്ച വൈകിട്ടാണ് പോത്തൻകോട് മീനാറ സ്വദേശി ഷഹനാസിനെ അഞ്ചംഗസംഘം വീടുകയറി ആക്രമിച്ചത്. 50,000 രൂപയാണ് ക്വട്ടേഷനുള്ള പ്രതിഫലം. സംഭവത്തിൽ ഇനി ഒരു പ്രതി കൂടി പിടിയിലാകാനുണ്ട്. ക്വട്ടേഷനെടുത്ത ഒന്നാംപ്രതി സജാദ് ജയിലിൽ വച്ചാണ് മറ്റ് പ്രതികളെ പരിചയപ്പെടുന്നത്. ആക്രമണത്തിൽ കാലിന് ഗുരുതരമായി പരിക്കേറ്റ ഷഹനാസ് ആശുപത്രിയിൽ ചികിത്സയിലാണ്. പ്രതികൾക്കെതിരെ വധശ്രമം,ഗൂഢാലോചന തുടങ്ങിയ വകുപ്പുകൾ പ്രകാരം കേസ് രജിസ്റ്റർ ചെയ്തു. ക്വട്ടേഷൻ നൽകിയ അൻവറിനെ പറ്റി പൊലീസ് അന്വേഷണം ആരംഭിച്ചു.
