വക്കം: ദിനവും നിരവധി ആളുകൾ കടന്നുപോകുന്ന നിലയ്ക്കാമുക്കിൽ വഴിയാത്രക്കാർക്ക് ഏറെ പ്രയോജനപ്പെടുമെന്ന പ്രതീക്ഷയിലാണ് ടേക്ക് എ ബ്രേക്ക് പ്രവർത്തനം ആരംഭിച്ചത്. കളക്ടറുടെയും സംസ്ഥാന ശുചിത്വമിഷന്റെയും പഞ്ചായത്തിന്റെയും കൂടിയുളള സംയുക്ത സംരംഭമായിരുന്നു വക്കം പഞ്ചായത്തിന്റെ കീഴിൽ പ്രവർത്തനം ആരംഭിച്ച ടേക്ക് എ ബ്രേക്ക്. നിലയ്ക്കാമുക്ക് ചന്തയ്ക്ക് സമീപം പഞ്ചായത്ത് ഏറ്റെടുത്ത ഗവ: യു.പി.എസിലെ നാല് സെന്റ് സ്ഥലത്താണ് ഇതിനായി കെട്ടിടം പണിതത്. വഴിയാത്രക്കാർക്ക് വിശ്രമിക്കുന്നതിനും പ്രാഥമിക ആവശ്യങ്ങൾ നിർവഹിക്കുന്നതിനും ചായയോ ലഘുഭക്ഷണമോ കഴിക്കുന്നതിനുമായാണ് ടേക്ക് എ ബ്രേക്ക് കെട്ടിടം നിർമ്മിച്ചത്. 2022ൽ നിർമ്മിച്ച കെട്ടിടം ഒ.എസ്. ആംബിക എം.എൽ.എയും അടൂർ പ്രകാശ് എം.പി.യും ചേർന്നാണ് ഉദ്ഘാടനം ചെയ്തത്. ഒരുവ‍ർഷത്തോളം മാത്രമാണ് കെട്ടിടം പ്രവർത്തിച്ചത്. എന്നാൽ വിവിധ ഉദ്ദേശ്യങ്ങൾക്കായി തുടങ്ങിയ ഈ സംരംഭം ഇപ്പോൾ ഉദ്ദേശ്യലക്ഷ്യങ്ങൾ ഒന്നുമില്ലാതെ പൂട്ടിയനിലയിലാണ്. ജനങ്ങൾക്ക് ഏറെ പ്രയോജനകരമായ ഈ കെട്ടിടം എത്രയും പെട്ടെന്ന് തുറന്ന് പ്രവർത്തിക്കുന്നതിനുള്ള നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.
