പ്രൈംവീഡിയോ സ്ട്രീമിങ് സേവനങ്ങളില് അടുത്തവര്ഷം മുതല് പരസ്യങ്ങള് പ്രദര്ശിപ്പിക്കും. ടിവി ഷോകളും സിനിമകളും നിര്മിക്കുന്നതിന് കൂടുതല് പണം കണ്ടെത്താനുള്ള ശ്രമത്തിന്റെ ഭാഗമായാണിത്. യുകെ, യുഎസ്, കാനഡ ഉള്പ്പടെയുള്ള രാജ്യങ്ങളിലെ ഉപഭോക്താക്കള്ക്ക് അടുത്തവര്ഷം തൊട്ട് പ്രൈം വീഡിയോയില് പരസ്യങ്ങളും കാണാം. എന്നാല് അധിക തുക നല്കിയാല് ഈ പരസ്യങ്ങള് ഒഴിവാക്കാം.
ഡിസ്നി പ്ലസ് ഹോട്ട്സ്റ്റാര്, നെറ്റ്ഫ്ളിക്സ് ഉള്പ്പടെയുള്ള എതിരാളികളെ അനുകരിച്ചുകൊണ്ടാണ് പ്രൈം വീഡിയോയുടെ ഈ നീക്കം. 2024 അവസാനത്തോടെ ഫ്രാന്സ്, ഇറ്റലി, സ്പെയ്ന്, മെക്സികോ എന്നിവിടങ്ങളിലേക്കും പരസ്യങ്ങള് എത്തിക്കും.
യുഎസില് 2.99 ഡോളര് പ്രതിമാസ നിരക്ക് നല്കിയാല് പ്രൈം ഉപഭോക്താക്കള്ക്ക് ഈ പരസ്യങ്ങള് ഒഴിവാക്കാം. മറ്റ് രാജ്യങ്ങളിലെ നിരക്കുകള് വെളിപ്പെടുത്തിയിട്ടില്ല. അതേസമയം ടിവിയിലും മറ്റ് സ്ട്രീമിങ് പ്ലാറ്റ്ഫോമുകളിലും ഉള്ളതിനേക്കാള് കുറച്ച് പരസ്യങ്ങള് മാത്രമേ പ്രൈമില് കാണിക്കുകയുള്ളൂ എന്നാണ് കമ്പനി പറയുന്നത്