ഇപ്പോൾ പണം ഇടപാടുകൾക്ക് മിക്കവാറും എല്ലാവരും ഉപയോഗിക്കുന്നത് യുപിഐ പിൻ ആണ്. ഗൂഗിൾ പേ ഉപയോഗിച്ച് എന്തിനും ഏതിനും പണമിടപാടുകൾ നടത്തുന്നവരാണ് ഭൂരിഭാഗം പേരും. എന്നാൽ ഇനിമുതൽ പണമിടപാടുകൾക്ക് മാത്രമല്ല വായ്പ എടുക്കാനും ഗൂഗിൾ പേ ഉപയോഗിക്കാം.
ഗൂഗിൾ പേ ഉപയോഗിച്ച് വായ്പയെടുക്കാൻ സഹായിക്കുന്നത് ഡി എം ഐ ഫിനാൻസ് എന്ന സ്വകാര്യ പണമിടപാട് സ്ഥാപനമാണ്. ഉപഭോക്താക്കൾക്ക് ഒരു ലക്ഷം രൂപ വരെയാണ് ഗൂഗിൾ പേ വഴി വായ്പയായി ഡിഎംഐ വാഗ്ദാനം ചെയ്യുന്നത്. വളരെ എളുപ്പത്തിൽ പൂർത്തിയാക്കാവുന്ന നടപടിക്രമങ്ങളിലൂടെ വായ്പ അപേക്ഷ പൂർത്തിയാക്കാൻ സാധിക്കും. അർഹരായ ഉപഭോക്താക്കൾക്ക് പരമാവധി ഒരു ലക്ഷം രൂപ വരെ പദ്ധതിക്ക് കീഴിൽ വായ്പ ലഭിക്കും.
അപേക്ഷയിൽ കൊടുത്ത വിശദാംശങ്ങൾ പരിശോധിച്ച ശേഷം ഗൂഗിൾ പേയുമായി ലിങ്ക് ചെയ്തിട്ടുള്ള അക്കൗണ്ടിലേക്ക് പണം ക്രെഡിറ്റ് ആകും. 36 മാസ തവണയായി തിരിച്ചടയ്‌ക്കേണ്ട വായ്പ പക്ഷേ എല്ലാ ഉപഭോക്താക്കൾക്കും ലഭ്യമല്ല. വായ്പ ലഭിക്കണമെങ്കിൽ ഗൂഗിൾ പേയുടെ പ്രീ യോഗ്യതയുള്ള ഉപഭോക്താക്കൾ ആയിരിക്കണം.
